بیجنگ۔ 04 فروری (اے پی پی) وزیراعظم عمران خان پارینے کہ چین و پاکستان آزموندہ سنگت ءُ، پاکستان و چین نا کمکاری آ مبنی تزویراتی شریداری ہرآزمائش آ پورو سلیسونے، چین نا قومی شونداری و اصلاحات کمیشن نا کمکاری ستاکڑزک، سی پیک آن ہڑتوم آ ملک آتا الس فائدہ ہرفنگ ءِ ، سی پیک نا زوت پورو مروک آ ڈٹ آتیان پاکستانی زرگزران آ مثبت اثر تمانے۔ وزیراعظم جمعہ نادے آ دورہ چین اٹی چین نا قومی شونداری و اصلاحاتی کمیشن نا چیئرمین ہی لی پنگ تون ورچوئل اوڑدہی کرے۔ اوڑدہی ٹی چین نا سیاسی سلابتی کونسل نا وائس چیئرمین ہم ساڑی ئسک۔ اوڑدہی ٹی سی پیک نا برجاڈٹ و آخبت نا گام گیج آتا جاچ ءِ ہلنگا۔ داوخت آ وزیراعظم تون اوار کابینہ نا باسک آک و بڑزکو کمامدارآک ہم ساڑی ئسر وخت اس کہ ہی لی پنگ تون اوار وائس چیئرمین ننگ جیزی و تانگ ڈینگ جی، این ڈی آرسی نا بڑزکو کمامدارآک ہم ساڑی ئسر۔ وزیراعظم داوخت آپارے کہ چین وپاکستان آزموندہ سنگت ءُ۔ پاکستان و چین نا کمکاری آ مبنی تزویراتی شریداری ہرآزمائش آ پورو سلیسونے۔ کوویڈ۔ 19 نا دین آن پد ہم ہڑتوم آ ملک آتا کمکاری نا سوب آن سی پیک ڈٹ آتیا کاریم برجائس۔ وزیراعظم پارے کہ چین نا قومی شونداری و اصلاحاتی کمیشن نا کمکاری ستاکڑزک۔ سی پیک، بیلٹ اینڈ روڈ انیشی ایٹو(بی آر آئی) ڈٹ انا اسہ اہم ءُ جزو اسے۔ سی پیک آن ہڑتوم آ ملک آتا الس فائدہ ہرفنگ ءِ۔ وزیراعظم پارے کہ سی پیک نا زوت پورو مننگ نا ڈٹ آتیان پاکستانی زرگزران آ مثبت اثر تمانے۔ سی پیک ڈٹ آک ملک انا پائیدار زرگزرانی شونداری نا پبی بنداو ءِ تخانو و دا ڈٹ آک پاکستان نا زرگزرانی منظرنامہ ءِ بدل کرینو۔ وزیراعظم پارے کہ سی پیک بی آر آئی نا فلیگ شپ ڈٹ اسے ہرانا تزویراتی اہمیت ہڑتوم آ ملک آتیکن ءِ و داڑآن ہڑتوم آ ملک آتا الس ءِ فائدہ دوئی مریک۔ وزیراعظم پارے کہ ہڑتوم آ فریق گوادر ءِ ڈیہہ نا زرگزرانی مرکز اس جوڑ کننگ کن تینا کوشست آتے برجاتخرہ۔ ایم ایل ون و ایلو اہم توانائی ڈٹ آتے اولیت بنداو تا وڑاٹ ہلنگک۔ داوخت آ چین نا قومی شونداری و اصلاحاتی کمیشن نا چیئرمین ہی لی پنگ پارے کہ چین سی پیک ڈٹ آتے بھاز اہمیت ایتک و چین سی پیک ڈٹ آتیا ترند رفتار پیش رفت کن سنبرینگوک ءِ۔ تدوک آ7 سال اٹی چین پاکستان نا غٹ آن بھلا واپاری شریداری ءِ و ہڑتوم آ ملک آک آخبت اٹ ہم جم اقتصادی و واپاری تعلقداری تا رفتار ءِ برقرار تخنگ نا خواہندار ءُ۔ اوپارے کہ این ڈی آر سی و غٹ تعلقدار چینی ادارہ غاک سی پیک ڈٹ آتیٹی زرکاری کن چینی، سرکاری و نجی ادارہ غاتا است بڈی کن تینا کوشست آتے برجاتخرہ۔ دا چرجوئی ٹی ہڑتوم آ کنڈآتیٹی پوسکن آ گرین، ڈیجیٹل ، جان جوڑی، واپار و صنعتی راہداری تا فیصلہ کریسر ہراڑآن دا بشخ آتیٹی شعبہ جاتی کمکاری ٹی ودکی مریک۔ وزیراعظم عمران خان نا کنڈآن پبی مخ تفی آ منت واری ءِ ہرفسا چیئرمین این ڈی آر سی صنعت، کشاری جدیدیت، سائنس و ٹیکنالوجی، راجی واقتصادی شونداری ٹی کمک کن چین نا رضامندی نا درشانی ءِ کرے۔ اوڑدہی ٹی ہڑتوم آ فریق آک زرکاری بورڈ و این ڈی آرسی نا نیام اٹ صنعتی کمکاری نا فریم ورک انا معاہدہ غا دستخط نا ستاءِ کریر ہراکہ چین نا صنعتی اکائی تے سی پیک، خصوصی اقتصادی زون تیان گدریفنگ اٹ آسراتی فراوان کیک و زرکاری ٹی ترندی بریک۔ ہڑتوم آ فریق آک گوادر آ 16 می جوائنٹ ورکنگ پڑک دیوان نا منٹ آتیا دستخط کریر۔ پاکستان نا کنڈآن ڈٹ بندی، شونداری و خصوصی گام گیج نا بنجائی وزیر اسد عمر و چین نا کنڈآن این ڈی آرسی نا وائس چیئرمین ننگ جینزی دستخط کرے۔
