صدر مملکت ڈاکٹر عارف علوی نا یکجہتی کشمیر دے انا وخت آ آزاد کشمیر کانود ساز اسمبلی نا دیوان آن تران

مظفرآباد۔ 05 فروری (اے پی پی) صدر مملکت ڈاکٹرعارف علوی پارینے کہ پاکستان نا اسہ سیاست دان اس ہم کشمیر آ سمجھوتہ کننگ نا جرات کننگ کپک، دنیا ءِ خبڑدار کینہ کہ بھارت ہراکنڈآ ہِننگ ءِ اوخطرناک ءِ و داڑآن دنیا نا امن بھس مننگ کیک، بھارت زیات ہرے اسکان کشمیری تے آجوئی نا حق آن محروم تخنگ کپک، مقبوضہ کشمیر نا الس بھارتی درواٹی بفس بلکن ظلم انا برخلاف توار بڑز کیر، مقبوضہ کشمیر اٹی انسانی حق انا لتاڑنگ آتیا جہانی برادری نا چپی حیرانی اسے۔ ہفتہ نادے آ یکجہتی کشمیر دے انا وخت آ مظفرآباد اٹی آزاد کشمیر کانود ساز اسمبلی نا دیوان آن تران کرسا اوپارے کہ کشمیریک ڈوگرہ راج، تحریک پاکستان نا وخت آ قربانی تسر و او اینو اسکان دا قربانی تے تننگ ءُ ، ہموڑے ورنا و کشمیری لیڈر آتے غیرکانودی زندان اٹ تخنگ، جعلی مقابلہ غاتیٹی اوفتا خون ءِ کننگ ءِ، میڈیا غا پابندی ءِ تانکہ ہموجاگہ نا حالیت آتیان دنیا بے خبر مرے۔ اوپارے کہ بھارت اگہ امن نا دعویدار ءِ تو او کشمیر نا کسرتے ملے، دنیا نا میڈیا ءِ رسینگ ایتے، سوشل میڈیا غا پابندی ءِ چٹفے، کودک بندغ آتا گھیڑ کننگ ءِ بند کے، دا گام گیج آتے بھارت نا کنڈآن ورناتا ہمت ءِ پرغنگ کن کننگ انگ ءِ، یورپ اٹی یہودی تیا ظلم آن پد ہم یہودیت نا ہیت مرسا کرینے، داجتا ءُ ہیت اسے کہ یہودیک داسہ تینٹ ظلم کننگ ءُ، داڑآن پک مریک کہ قوم تے زوراکی اٹ توننگ مفک، کشمیری تیا ہم ظلم چٹک، ہموڑے اسہ چناس ہم دُن کہ اف ہراکہ آجوئی نا ہیت ءِ کپ، دُن ءُ اسہ لمہ اس ہم اف ہراتینا چناءِ آجوئی نا درس تف۔ صدر مملکت پارے کہ تاریخ پک کرے کہ بھارت نا کشمیر نا بابت غٹ قول آک درو و چاپلوسی ئسر، دا ڈیہہ ءِ مجاہد آک آجوکرفیر ولدا نن اٹی بھارت اقوام متحدہ غا ہنا وخت اس کہ نن دا سمجھان کہ اقوام عالم نا پوسکن آ ادارہ اقوام متحدہ دا قراردادآتیا عملدرآمد کرفک۔ صدر مملکت پارے کہ اسہ سازش اسے نا رداٹ گورداسپورنا علاقہ ءِ بھارت ءِ تننگا انتئے کہ داکان بیدس کشمیر نا ہچ ءُ ڈغاری کسر اس الوکہ، داہمو تعصب آک ئسر ہرافتا بنداو آ بھارت کشمیرآ کوزہ گیر مس۔ اوپارے کہ پاکستان جمہوری کسر اٹ جوڑ مس، مخلوق آن اوفتا سلاہ ءِ اَریفنگا تو اوفک پاکستان نا حق اٹی فیصلہ تسر، جوناگڑھ و حیدر آباد آ بھارت کوزہ کرے، مسلمان گیشتری تخوک علاقہ مننگ نا سوب آن کشمیر پاکستان اٹ بایدے اوار مروسس۔ اوپارے کہ بزرگ کشمیری راہشون سید علی گیلانی ءِ پابند سلاسل تخنگا ولے اونا نظریہ آ ہچ ءُ پرخ اس تمیتو، اونا جوزہ جوان ئس و اوہروخت شہادت کن تیار ئسک۔ اوسوج کرے کہ انت اُراتے دڑفنگ نا کانود اس ارے، زنا بالجبر ءِ ریاستی سلہہ نا وڑاٹ کاریم اٹ اتنگ انگ ءِ، کشمیر اٹی کروک آ ظلم بیان کننگ مفک، ہندوتوا نظریہ و خار انا بنداو آ ہندوستان تینا صدی تیا متکن تاریخ ءِ چٹفسا دروغ انا تاریخ اس نوشتہ کننگ  خواہک، ننے داڑتون ہچ ءُ کاریم اس اف ولے مسلمان تیا ظلم آ نن چپ منگ کپنہ، اینو بھارتی گام گیج آتیان پک مریک کہ دوقومی نظریہ درست ئس۔ اوپارے کہ پیلٹ گن آتا کاریم اٹ اتنگ ءِ انسانی حق انا ویل تکسا دنیا خاموش تماشائی نا کڑد ءِ ہلسا داڑآ توار بڑزکے۔ اوپارے کہ کشمیر نا آجوئی یقینی ءِ، بھارت کمشیر اٹی آبادی نا کچ ءِ بدل کننگ اٹ سرسہب مننگ کپک، کشمیری تا مزاحمت ءِ خنسا نن پاننگ کینہ کہ بھارت اوفتے زیات ہرے اسکان محکوم تخنگ کپک، نن دنیا ءِ خبڑدار کننگ اُن کہ بھارت مسلمان تا نسل کشی ءِ کننگ ءِ، کشمیر اٹی اوانتظامی اعتبار اٹ اوڑآ عمل کننگ ءِ ، کشمیری تا روزگار ءِ بھس کننگ انگ ءِ، توفک نا زور آ بیدادی آن پد کشمیری بھارت ءِ بشخپسہ۔ اوپارے کہ بھارت ہراچم آتے اختیار کیک کے ولے کشمیر اٹی زرکاری بفک انتئے کہ کشمیر نا جھیڑہ ءِ ایسر مروئی ءِ و داوڑنا غٹ زرکاری زیان مریک۔ اوپارے کہ دنیا نا کانود و انصاف ہراتم اسکان خاموش تماشائی مرسا کیک، مسلمان نئے ظلم کیک و نئے سگک۔ اوپارے کہ کشمیریک طے کرینو کہ او پرامن وڑاٹ آجوئی نا تحریک ءِ برجاتخرہ، نن جہانی ادارہ غاتے پبی موقع تننگ خوانہ کہ او دا ویل انا ایسر اس کشے، ولے مظلوم کشمیریک ہراتم اسکان اودے موقع ایترہ، او سلہہ ہرفنگ کیرہ، ہفت دہائی آن کشمیری تیا ظلم کننگ انگ ءِ۔ صدر مملکت پارے کہ پاکستان نا دا قول ءِ کہ کشمیریک اودے مدام تین تون اوار خنرہ، کشمیری آ کس اس سودابازی کننگ کپک، کس اسے دا مجال اف کہ او داڑآ سمجھوتہ کے، دا بابت دروغ انا خبرآتیان خیال کیر، کشمیر نا بارواٹ فیک نیوز ہائبرڈ وار انا بشخ اسے، کشمیری تتون پاکستانی تا دترنا تعلق و است آک اسٹ ءُ، نن دنیا ءِ خبڑدار کینہ کہ او اقوام متحدہ نا قرارداد آتیا عملدرآمد کرفے، بھارت ہرا کسر آ ہِننگ ءِ او خطرناک ءُ کسر اسے، داڑآن دنیا نا امن ءِ نسخان سرمننگ کیک، کشمیرنا بابت اقوام متحدہ نا چندی قراردادآک ءُ ہرافتیا بھارت دستخط کرینے۔ اوپارے کہ کشمیری تے ننا کلہو ءِ کہ نن نم تون تفوک اُن و کشمیر نا جھیڑہ نا پرامن ایسری کن کوشست کننگ اُن، ننے پکااومیت ءِ کہ کشمیرنا آجوئی ءِ تینا زند اٹ خنینہ۔