پاکستان کشمیری تا سیاسی، اخلاقی مخ تفی ءِ برجاتخک، شفقت محمود

اسلام آباد۔ 05 فروری (اے پی پی) بنجائی وزیر تعلیم شفقت محمود پارینے کہ پاکستان حق خودارادیت نا جہد کروک آ کشمیری تا سیاسی، سفارتی و اخلاقی مخ تفی ءِ برجاتخک۔ ہفتہ نادے آ اسہ بیان اسے ٹی اوپارے کہ اینو پاکستان اٹی یوم یکجہتی کشمیر اڈتننگ انگ ءِ تانکہ بھارت نا غیرکانودی کوزہ گیری ٹی مقبوضہ جموں و کشمیر نا مخلوق تون یکجہتی نا درشانی ءِ کننگ مرے، مچ آ پاکستانی قوم تینا کشمیری ایلم و ایڑھ تتون سلوک ءِ ہرا بھارتی ظلم انا مقابلہ ءِ کننگ ءُ۔ اوپارے کہ وزیراعظم عمران خان کشمیری تا آجوئی نا مقدمہ ءِ پبی وڑاٹ دنیا نا مون آ پیش کرے، کشمیری الس تینا حق خودارادیت نا دوئی کننگ کن تینا دتراٹ اسہ پوسکن ءُ تاریخ اس نوشتہ کرینو، پاکستان مدام مقبوضہ کشمیر اٹی ریاستی جور و انسانی حق انا خلاف ورزی تا برخلاف توار بڑز کرینےو حق خودارادیت کن کشمیری تا سیاسی، سفارتی و اخلاقی مخ تفی ءِ برجاتخک۔ شفقت محمود پارے کہ داگڑتی نا ہیت اسے کہ بھارتی فوج انا مقبوضہ کشمیر نا الس آ پدریسہ ظلم وستم آن پد ہم داسکان جہانی ضمیر بش متنے۔