پاکستان نا الس کشمیری تا اوفتا چٹپروک آ خودارادیت کن انصاف اٹ جہد اٹی تینا نزور مفروک مخ تفی نا درشانی ءِ کننگ کن یکجہتی کشمیردے  ءِ اڈتننگ ءُ، وزیراعظم عمران خان

اسلام آباد۔ 05 فروری (اے پی پی) وزیراعظم عمران خان پارینے کہ پاکستان نا الس کشمیری تا اوفتا چٹپروک آ حق خودارادیت کن انصاف اٹ جہد اٹی تینا نزور مفروک مخ تفی نا درشانی ءِ کننگ کن یکجہتی کشمیر دے ءِ اڈتننگ ءُ۔ بھارتی غیرکانودی کوزہ گیرجموں و کشمیر جہانی وڑاٹ مسلمہ جھیڑہ اسے  ہرااقوام متحدہ سلامتی کونسل نا تعلقدار قرارداد آتا رداٹ ایسری نا خواہندار ءِ۔ یکجہتی کشمیر دے انا وخت آ تینا کلہو اٹی وزیراعظم پارے کہ بھارت نا 5 اگست 2019 نا غیرکانودی و اسہ کنڈی گام گیج آن پد بھارتی غیرکانودی کوزہ گیری ٹی جموں و کشمیر اٹی انسانی حق انا حالیت آک پدریسہ خراب و ابتر مننگ ءُ۔ اوپارے کہ غیر انسانی فوجی گھیڑ ہرا کم و ود دونیم سال آن داتم اسکان ساڑی ءِ، نا نتیجہ ٹی سد آ کشمیری شہید مسنو۔ وزیراعظم پارے کہ بھارتی کوزہ گیر فوج کشمیری نرینہ، نیاڑی ، چناو بزرگ آتا برخلاف وحشیانہ واک ءِ کاریم اٹ اتنگ ءِ۔ بے روک ٹوک جور و استبداد نا دا مہم اٹی خاص وڑاٹ کشمیری ورناتے شست کننگانے۔ بھارتی غیرکانودی کوزہ گیرجموں و کشمیراٹی استبدادی کارروائی تا بدترین درشانی پیلٹ گن آتا کاریم اٹ اتنگ و آبادی تے اجتماعی سزا تننگ تون اوار گلی کوچہ غاتے تباہ وبرباد کننگ ءِ۔ بھارتی کوزہ گیر فوج انا کنڈآن کشت و خون نا چٹپروک آ ریسہ، کشمیری و انسانی حق انا محافظ آتا سجفوک دزگیری و شہید آتا میت آتے وارث آتا دوٹی تننگ آن انکار مچ آ دنیا نا مخلوق کن بھاز گڑتی نا باندات اسے۔ عمران خان پارے کہ بھارت کشمیری الس نا عزم ءِ متزلزل کننگ و اوفتا روا جہد ءِ لتاڑنگ کن بدترین ریاستی دہشت گردی نا بازار ءِ گرم کرینے۔ مچ آ بھارتی ریاستی مشینری انسانیت نا برخلاف داناقابل تیان ڈوہ ٹی اوار ءِ۔ اوپارے کہ 9 لکھ آن زیات بھارتی کوزہ گیر فوج غیرکانودی آبادیاتی بدلی و کشمیری تے زرگزرانی وڑاٹ نزور کرسا اوفتا یکتا شناخت و دودوربیدگ آ جلہو نا کمک اٹ اوفتے خوفزدہ کننگ نا چرجوئی ءِ برجاتخانے۔ اوپارے کہ بھارتی چم ہرافتا مسخت بھارتی غیرکانودی کوزہ گیر جموں و کشمیر اٹی مسلم گیشتری ءِ اوفتا تینا گل زمین آ اقلیت اٹ بدل کننگ ءِ، اقوام متحدہ سلامتی کونسل نا قرارداد و چارمیکو جنیوا کنونشن تون اوار جہانی کانود نا خلاف ورزی ءِ۔ وزیراعظم پارے کہ بھارتی غیرکانودی کوزہ گیر جموں و کشمیر اٹی برجاظلم انا وڑ انتہاپسند آرایس ایس ۔ بی جے پی تنظیم نا امن مخالف و مسلم دشمن ہندوتوا ایجنڈا ءِ ظاہرکیک۔ بھارت امن و سوگوی کن پاکستان نا کوشست آتا مثبت ورندی ءِ تتو۔ پاکستان و کشمیری الس بھارت نا غیرکانودی و اسہ کنڈی گام گیج آتے یکسر مسترد کرینو۔ اوپارے کہ ڈیہہ ٹی پائیدار امن، سلامتی و شونداری نا سیبو جموں و کشمیر نا جھیڑہ نا پرامن ایسری آٹے۔ داالمی ءِ کہ بھارت اقوام متحدہ نا کنڈآن کشمیری تے آجوو بے کنڈہلوک سلاہ درشانی نا کاریم اٹ اتنگ نا حق ءِ ایتے۔ کشمیر نا سفیر نا حیثیت اٹ اسہ وار ولدا باور کرفیوہ کہ پاکستان تینا کشمیری ایلم و ایڑھ تا ہرممکن مخ تفی ءِ برجاتخک۔ جہانی برادری کن دا وخت ءِ کہ او بھارتی غیرکانودی کوزہ گیر جموں وکشمیر اٹی پراگندہ ڈوہ تیا بھارت نا محاسبہ ءِ کے و اقوام متحدہ سلامتی کونسل نا قرارداد و کشمیری الس نا است خواہی تا رداٹ جموں وکشمیر نا جھیڑہ نا انصاف اٹ و پرامن ایسری نا بابت گام گیج کے۔