بھارتی فوجیک کوزہ گیر جموں وکشمیر ءِ زندان اسے ٹی بدل کرینو، صدر عارف علوی، وزیراعظم عمران خان نا یکجہتی کشمیر نا وخت آ کلہو

اسلام آباد۔ 05 فروری (اے پی پی) صدر مملکت ڈاکٹر عارف علوی پارینےکہ 9 لکھ آن زیات بھارتی کوزہ گیر فوجیک غیرکانودی وڑاٹ کوزہ گیر جموں و کشمیر ءِ زندان اسے ٹی بدل کرینو۔ کشمیر میڈیا سروس نا رداٹ صدر اینو یکجہتی کشمیر دے اناوخت آ تینا کلہو اٹی پارے کہ بھارت کشمیری تا برخلاف ریاستی دہشت گردی ءِ کاریم اٹ اتنگ ءِ ہراٹی عدالت آن ایڑتر خون، غیرکانودی نظربندی، جعلی مقابلہ، جبری بے گواہی، پیلٹ توفک آتا کاریم اٹ اتنگ، ہند آتا بھسکاری گھیڑ و پٹنگ نا کارروائیک اوار ءُ۔ اوپارے کہ کشمیری تے دزگیر کرسا تشدد نا شست کننگ انگ ءِ۔ ڈاکٹر عارف علوی پارے کہ کشمیری تا دا جہد ہفت دہائی آن زیات وخت آن برجاءِ، و دا زبردست مشکل آتا برخلاف اومیت، خوف انا برخلاف ہمت و ظلم انا برخلاف قربانی نا جنگ ءِ۔ اوپارے کہ کشمیریک جور و استبداد نا بھارتی مہم نا مون آ ثابت قدم ءُ۔ صدر تینا حق خودارادیت نا دوئی کننگ کن کشمیری تا بے مٹ عزم ءِ خراج تحسین پیش کرسا پارے کہ مچ آ پاکستانی قوم اوفتے تون سلوک ءِ ۔ داکان بیدس وزیراعظم عمران خان یکجہتی کشمیر دے انا وخت آ تینا کلہو اٹی کشمیری تیکن پاکستان نا ہرممکن مخ تفی نا باور کرفے و جہانی برادری آ زور شاغا کہ او بھارت ءِ مقبوضہ جموں و کشمیر اٹی اونا  پراگندہ ڈوہ تیکن جوابدہ کے و کشمیر نا ویل انا اقوام متحدہ نا سلامتی کونسل نا قرارداد و کشمیری الس نا است خواہی تا رداٹ ایسر کن کڑد ادا کے۔ وزیراعظم پارے کہ کشمیر جہانی کہول آ امنا مروک جھیڑہ اسے ہرانا ایسری اقوام متحدہ نا سلامتی کونسل تعلقدار قرارداد آتیٹی ساڑی ءِ۔ اوپارے کہ 5 اگست 2019 نا غیرکانودی و اسہ کنڈی بھارتی گام گیج آتیان پد مقبوضہ علاقہ ٹی انسانی حق انا حالیت آک پدریسہ خراب مرسا ہِننگ ءُ۔ وزیراعظم پارے کہ بھارتی فوجیک کشمیری نرینہ، نیاڑی، چنا و بزرگ آتا برخلاف بے پرخ واک انا وحشیانہ کاریم اٹ اتنگ ءِ برجاتخانو۔ اوپارے کہ بھارت کشمیری الس نا عزم ءِ پرغنگ و اوفتا رواجہد ءِ لتاڑنگ کن اوفتا برخلاف بدترین ریاستی دہشت گردی کننگ ءِ۔ وزیراعظم پارے کہ بھارتی گام گیج ہرافتا مسخت مقبوضہ علاقہ ٹی مسلم گیشتری ءِ اوفتا تینا گل زمین آ اقلیت اٹ بدل کننگ ءِ سلامتی کونسل نا قرارداد و جہانی کانود نا خلاف ورزی ءِ۔