پاکستان کشمیر تون سلوک ءِ و سلک، صدر مملکت ڈاکٹر عارف علوی نا یوم یکجہتی کشمیر نا وخت آ ریلی آن تران

اسلام آباد۔ 05 فروری (اے پی پی) صدر مملکت ڈاکٹر عارف علوی پارینے کہ پاکستان بھارت نا غیرکانودی کوزہ گیری ٹی جموں وکشمیر نا جھیڑہ نا اقوام متحدہ نا سلامتی کونسل نا قرارداد آتا رداٹ پرامن ایسری ءِ خواہک۔ ہراٹی مظلوم کشمیری الس ءِ حق خودارادیت نا ضمانت تننگانے، مقبوضہ کشمیر وخت اس ہم بھارت نا بشخ متنےو غیرکانودی وڑاٹ مقبوضہ علاقہ ءِ تینا بشخ گوندنگ نا بھارتی آئین ءِ ہم امنا کتنے۔ اوہفتہ نادے آ یوم یکجہتی کشمیر نا چرجوئی ٹی دفترخارجہ غان ڈی چوک اسکان ریلی نا کماشی ءِ کننگ آن پد بشخ ہلوک آتیان تران کریکہ۔ داوخت آ چیئرمین سینیٹ محمد صادق سنجرانی، اسپیکر قومی اسمبلی اسد قیصرخان، ڈپٹی اسپیکر قومی اسمبلی قاسم خان سوری، پارلیمانی کشمیر کمیٹی نا چیئرمین شہریارخان آفریدی، وزیرداخلہ شیخ رشید احمد، وزیرمذہبی امور پیر نورالحق قادری تون اوار وزیر آک، پارلیمنٹ نا باسک آک ، حریت راہشونک ہم بشخ ہلکر۔ ریلی ٹی میڈیا تون اوار چندی زند انا بشخ آتیان تعلق تخوک آ بندغ آک ہم ساڑی ئسر۔ بشخ ہلوک آک پلے کارڈ و بینرز ہرفیسر ہرافتے ٹی مقبوضہ کشمیر نا الس ءِ اقوام متحدہ نا سلامتی کونسل نا قرارداد آتا رداٹ حق خودارادیت ترفنگ کن اوفتا اخلاقی، سفارتی و سیاسی مخ تفی نا عزم کننگاسس۔ داوخت آ صدر مملکت ڈاکٹر عارف علوی تران کرسا پارے کہ ہمودے مُر اف ہراتم بھارت نا کوزہ ٹی جموں وکشمیر نا مظلوم الس بھارتی کوزہ غان آجوئی دوئی کیرہ۔ اوجہانی برادری آ زور شاغا کہ او مقبوضہ جموں و کشمیر نا مخلوق ءِ اوفتا است خواہی نا رداٹ حق خودارادیت نا بابت کروک آ قول آتا پوروی ءِ پک کے۔ اوپارے کہ آجوئی نا توار تے توننگ کن بھارتی کوزہ گیر فوج مقبوضہ جموں وکشمیر اٹی پورو لاک ڈاؤن و میڈیا نا بلیک آؤٹ کرینے تانکہ کشمیری تا توار و پدریسہ بھارتی ظلم ءِ بے نقاب کروک آ غٹ توار تے چپ کرفنگ مرے۔ اوپارے کہ پاکستان و کشمیری الس نا است اسہ ایلو تون دھڑکک۔ ہراتم مقبوضہ کشمیر اٹی خون خراب مریک تو پاکستان نا مخلوق نا است ہسون مریک۔ اوپارے کہ پاکستان دنیا ءِ کشمیری الس تون تینا قول آتا شرف نا یات ترفک۔ کشمیری تا قربانی تے خراج تحسین پیش کرسا اوپارے کہ قائد اعظم کشمیر ءِ پاکستان نا شہ رگ گونداسس و کشمیری الس تینا دتر ءِ شولسا دانا شاہدی ءِ تننگ ءِ۔ صدر مملکت ایماندار کشمیری راہشون سید علی گیلانی نا دا بیان نا ہم حوالہ ءِ تس کہ کشمیر و پاکستان ہڑتوم آک کنا ءُ۔ صدر مملکت پارے کہ یکجہتی دے انا وخت آ او داوڑنا احساس تے سوگوی تننگ خواہک ۔ 5 اگست نا گام گیج آن بھارتی حکومت اقوام متحدہ نا سلامتی کونسل نا قرارداد ، جنیوا کنونشن و اونا چارٹر نا خلاف ورزی کرینے وخت اس کہ او جہانی برادری تون تینا کروک آ قول آتا ہم خلاف ورزی ءِ کرینے۔ صدر مملکت پارے کہ مقبوضہ کشمیر اٹی 8 لکھ بھارتی فوج کشمیری تا توار ءِ توننگ کن گھیڑ و پٹنگ نا کارروائی کننگ ءُ وخت اس کہ کرفیو نا نافذ تون اوار اوار جعلی مقابلہ غاتا چرجوئی برجاءِ۔ کشمیری راہشون تے اُراتیٹی نظر بند کننگانے، سید علی گیلانی نا جنازہ ٹی ہم مخلوق ءِ بشخ ہلنگ کن ہلنگتو۔ صدر مملکت پاکستان نا کشمیری الس نا جہد نا اخلاقی ، سیاسی و سفارتی مخ تفی نا درشانی ءِ کرسا پارے کہ تدوک آ 70 سال آن کشمیر اٹی بھارتی ظلم انا چرجوئی برجاءِ۔ بھارت دا ویل ءِ اقوام متحدہ غادرے و پاکستان اونا ایسری کن جہانی ادارہ غا پت کرے ولے او افسوز نا درشانی ءِ کرسا پارے کہ جند انا فائدہ غاتا سوب آن دنیا ٹی اخلاقیات نا ہچ ءُ اہمیت اس سلتنے۔ اوپارے کہ مچ آ دنیا نا غٹ اختہ مروک مخلوق تیکن کمک و رکھ اکن تنظیم اسے نا کنڈآ ہُننگ ءُ۔ اوپارے کہ کشمیر نا مخلوق نا برخلاف ادارہ جاتی ڈوہ مسنے ہرافتے ٹی گینگ ریپ و پیلٹ گن آتا کاریم اٹ اتنگ اوار ءِ۔ اوپارے کہ بھارت ءِ تینا اسہ بشخ اسے ٹی ہم پیلٹ گن آتا کاریم اٹ اتنگ نا جیرت متنے۔ اوکشمیری تا توار ءِ توننگ کن اسرائیلی ماڈل آ عمل کننگ ءِ۔