اسلام آباد۔ 05 فروری (اے پی پی) اسپیکر قومی اسمبلی اسد قیصر و ڈپٹی اسپیکر قاسم خان سوری ئسک پارینو کہ ڈیہہ ٹی پائیدار امن کن کشمیر نا ویل انا ایسری المی ءِ، کشمیر نا ویل آ مچ آ پاکستانی قوم یکجاءِ، پاکستان نا پارلیمنٹ کشمیر نا ویل انا پرامن ایسری کن پورو وڑاٹ سنبرینگوک ءِ ۔ اسپیکر قومی اسمبلی اسد قیصر یکجہتی کشمیر دے انا وخت آ قومی اسمبلی سیکرٹریٹ آن جاری کلہو اٹی پارے کہ کشمیر نا ویل بیرہ اسہ علاقائی ءُ جھیڑہ اس اف بلکن دا 80 لکھ مخلوق نا خودارادیت نا ویل ءِ بھارت نا دروغ انا پروپیگنڈا غان کشمیر نا آجوئی نا توار ءِ توننگ مفک۔ بے گناہ کشمیری تا برخلاف بھارتی حکومت نا جور و ظلم دنیا و ڈیہہ نا امن ءِ گہیو تخانے۔ اوپارے کہ بھارت نا آئین آن آرٹیکل 370 و 35 اے ءِ منسوخ کننگ آن کشمیری الس ءِ اوفتا شناخت و آجوئی آن محروم کرینے۔ اوپارے کہ پاکستان نا چناچنا تینا کشمیری ایلم تتون تفوک ءِ و پاکستان پارلیمانی سفارتکاری نا کمک اٹ غٹ جہانی و علاقائی فورم تیا کشمیری تا مقدمہ تون پبی وڑاٹ مون تننگ ءِ۔ ڈپٹی اسپیکر قومی اسمبلی قاسم خان سوری پارے کہ پاکستان کشمیر نا ویل انا پرامن ایسری نا خواہندار ءِ و مشکل نا داساہت اٹ تینا کشمیری ایلم تتون سلوک ءِ۔اوپارے کہ پاکستان علاقائی و جہانی فورم تیا کشمیری الس نا اخلاقی، سفارتی و سیاسی مخ تفی ءِ برجاتخک۔
