پشاور۔ 05 فروری (اے پی پی) پشاور اٹی یکجہتی کشمیر دے انا وخت آ گورنر خیبرپختونخوا شاہ فرمان و وزیراعلیٰ محمودخان نا کماشی ٹی ریلی اس اڈتننگا ہراٹی صوبائی کابینہ نا باسک آتیان بیدس سرکاری کمامدار، راجی شخصیت و طالب علم آک بھلو کچ اسے ٹی بشخ ہلکر۔ ریلی ٹی بشخ ہلوک آتیان تران کرسا گورنر خیبرپختونخوا پارے کہ پاکستان کشمیری الس نا حق خودارادیت و جہد آجوئی ٹی اوفتے تون تفوک ءِ بھارتی کوزہ غان آجوئی کن کشمیری الس تون یکجہتی و پورو مخ تفی ءِ برجاتخک، اوپارے کہ کشمیر نا ویل اسٹ انگا جہانی ویل ءِ ہرا 1948 اٹی اقوام متحدہ نا جہانی فورم آ اتنگا کیہی وخت آک گدرینگار ولے اقوام متحدہ نا کشمیری الس ءِ حق خودارادیت تننگ نا قرارداد آتیان پد ہم دا ویل اینو اسکان ایسر مننگ کتو جموں و کشمیر اٹی بھارت نا ظلم سلنگ آن پد ہرپوسکن آ دے اتون ودسا ہِننگ ءِ۔ اوخواست کرے کہ جہانی برادری کشمیر نا ویل انا نزاکت و کڑمبی ءِ سرپند مرسا جہانی جھیڑہ نا آخبتی ایسر اس پٹے، انشااللہ ہمودے مُراف ہراتم مقبوضہ کشمیر نا الس بھارتی کوزہ و ظلم و جور آن آجومریک۔ اومستی پارے کہ وزیراعظم عمران خان اقوام متحدہ نا جنرل اسمبلی ٹی ہراوڑاٹ کشمیر نا مقدمہ ءِ ہرفینے اونا تاریخ اٹ درور ملیپک، نن حق خودارادیت نا دوئی کننگ اسکان کشمیری الس نا سیاسی ، اخلاقی و سفارتی مخ تفی ءِ برجاتخنہ۔
