اقوام متحدہ۔ 04 فروری (اے پی پی) اقوام متحدہ ٹی پاکستان نا آخبتی مندوب منیر اکرم پارینے کہ اودے یخین ءِ کہ کشمیری تا حق خودارادیت نا دوئی کننگ و بھارت نا غیر کانودی کوزہ غان آجوئی نا جہد سرسہبی اٹ ہمکنار مریک۔ اوپارے کہ تدوک آ دے نیویارک اٹی یوم یکجہتی کشمیر نا وخت آ اقوام متحدہ کمیونٹی نا پن آ تینا کلہو اٹی پارے کہ کشمیر پاکستان نا شہ رگ و ناقابل تنسیخ بشخ اسے۔ اوپارے کہ پاکستانی قوم مدام بھارتی جارحیت و زور انا برخلاف تینا کشمیری ایلم تتون سوگوی اٹ سلوک مسنے و مدام اوفتے تون سلک۔ اوپارے کہ کشمیر نا ویل سویلی ایشیاٹی حق خودارادیت نا بے پورو ایجنڈا ءِ۔ 1948 اٹی اقوام متحدہ نا سلامتی کونسل نا قرارداد آتیٹی داہیت ءِ پیدوار کننگاسس کہ ریاست جموں و کشمیر نا آخبت نا گڈیکو فیصلہ اقوام متحدہ نا کنڈآن آجو و بے کنڈ ہلوک استصواب رائے نا کمک اٹ ریاست نا الس نا است خواہی نا رداٹ کننگک۔ اوپارے کہ وزیراعظم عمران خان کشمیری تا حق انا پرزور وکالت ءِ کرسا جموںو کشمیر اٹی بھارت نا کنڈآن برجاانسانی حق انا بھلا خلاف ورزی تے جہانی کہول آ تالان کرینے و دنیا ءِ باور کرفینے کہ سویلی ایشیاٹی پائیدار امن و سلامتی کن کشمیر نا جھیڑہ نا منصفانہ ایسر المی ءِ۔ اوپارے کہ اقوام متحدہ نا سیکرٹری جنرل داہیت ءِ دُوارہ پک کرینے کہ جموں و کشمیر آ اقوام متحدہ نا موقف اقوام متحدہ نا چارٹر و سلامتی کونسل نا قراردادآتیا مبنی ءِ۔ اوپارے کہ سلامتی کونسل تدوک آ 2 سال اٹی جموں و کشمیر نا حالیت آتیا سجفنگ کن 3 دیوان اڈتس۔ اقوام متحدہ نا جنرل اسمبلی نا صدر، انسانی حق انا ہائی کمشنر و انسانی حق انا ایلو چاہندار، خصوصی مندوبین و انسانی حق انا تنظیم تا کنڈآن چندی وارخواہی تیا جموں و کشمیر اٹ بھلو کچ اسے آ بھارتی ظلم ، جارحیت و ڈوہ غا گڑتی ان درشانی ءِ کننگانے۔ اوپارے کہ نیویارک اٹی پاکستان نا آخبتی مشن ہرفورم آ کشمیری تا حق خودارادیت نا منصفانہ جہد نا وکالت و اودے مون آ دننگ و جموں وکشمیر اٹی بھارت نا ظالمانہ جور و غیرکانودی کوزہ ءِ پاش کرسا کیک۔
