اسلام آباد۔ 04 فروری (اے پی پی) سینیٹ اٹی قائد حزب اختلاف سینیٹر یوسف رضاگیلانی پارینے کہ کشمیر نا جھیڑہ ءِ ایسر کننگ آن بیدس ڈیہہ ٹی پائیدار امن مننگ کپک، ہراتم اسکان بھارت 5 اگست 2019 ء نا گام گیج ءِ پدی ہلپک ہڑتوم آ ملک آتا نیام اٹ ہڑدے ئی تعلقداری بحال مننگ کپک۔ جمعہ نادے آ بڑزکو ایوان نا دیوان اٹی یوم یکجہتی نا وخت آ غیرکانودی وڑاٹ بھارت نا کوزہ ٹی مقبوضہ جموں وکشمیر نا ساڑی آ حالیت آتیا شرہ کننگ نا تحریک آ شرہ نا بناءِ کرسا سید یوسف رضاگیلانی پارے کہ ہفت دہائی آن بھارت کشمیری تیا ظلم کننگ ءِ، کشمیریک مواصلاتی پابندی تا گواچی ءُ، مقبوضہ کشمیر اٹی آبادی نا بیٹ کچ ءِ بدل کننگ انگ ءِ، غیرکشمیری تے ہنکینی سرٹیفکیٹ بشخنگ انگ ءِ، نن کشمیری الس تون ہمووخت اسکان سلوک اُن کہ ہراوخت اسکان اقوام متحدہ نا قرارداد آتا رداٹ اوفتے اوفتا حق خودارادیت ملپک۔ اوپارے کہ پیپلزپارٹی مدام کشمیر نا ویل آ توار بڑزکرے، بھارت مقبوضہ کشمیر اٹی جنیوا کنونشن و انسانی حق انا بھلا خلاف ورزی تیٹی اوار ءِ، سید علی گیلانی آخیریکو دم اسکان کشمیر مریک پاکستان نا نعرہ ءِ خلسا کرے، بھارت نا کنڈآن اودے جہہ جاگہ کننگ نا عمل اٹ اڑاند شاغنگ قابل مذمت ءِ۔ اوپارے کہ سویلی ایشیاٹی ہمووخت اسکان امن مننگ کپک ہراوخت اسکان کشمیر نا ویل کشمیری تا است خواہی تا رداٹ ایسر مفک۔
