اسلام آباد۔ 04 فروری (اے پی پی) چیف جسٹس آف پاکستان جسٹس عمر عطا بندیال تون کمانڈ اینڈ اسٹاف کالج کوئٹہ نا ڈل اوڑدہی کرے۔ جمعہ نادے آ عدالت عظمیٰ آن جاری سرجم حوال آتا رداٹ لیفٹیننٹ کرنل ہاشم اقبال باجوہ نا کماشی ٹی کمانڈ اینڈ اسٹاف کالج کوئٹہ نا ڈائریکٹنگ سٹاف و ملٹری بیوروکریسی کورس انا بیست سنگت ملک آتا بشخ ہلوک آتیا تالان 49 باسکی ڈل داڑے سپریم کورٹ اٹی چیف جسٹس عمر عطابندیال تون اوڑدہی کرے۔ چیف جسٹس آف پاکستان ڈل ءِ بخیر اٹ پارے و اوفتے اسلامی جمہوریہ پاکستان نا 1973 نا آئین نا بابت معلومدار کرے۔ چیف جسٹس آف پاکستان ڈل ءِ پارلیمنٹ، ایگزیکٹوز و عدلیہ نا کڑد و اہمیت نا بابت ہم پارے۔ چیف جسٹس عمرعطابندیال ڈل ءِ عدالتی نظام ، عدالت آتا کاریم ، کڑد، انصاف نا فراوانی و سپریم کورٹ، ہائی کورٹس و ضلعی عدالت آتا آئینی دائرہ اختیار نا بابت ہم پارے۔ چیف جسٹس آف پاکستان ڈل ءِ آئین پاکستان اٹ درج بنداوی حق انا بابت ہم معلومدار کرے۔ چیف جسٹس ڈل ءِ پارے کہ پاکستان اٹی سلہہ بند فوج بھاز اہم ءُ کڑد اس ادا کیک و اودے بھاز عزت و شرف نا نظر اٹ ہُننگک انتئے کہ پاکستان نا فوج ملکی قومی فائدہ غاتیکن تینا جون تے ندر کیک وخت اس کہ نوکاپ و زمی جمب کون آ خاص انگا حالیت آتیٹی شاری و جمہوری ادارہ غاتا کمک کن ہم پیش پیش سلک۔ داوخت آ چیف جسٹس عمر عطا بندیال بشخ ہلوک آتا سوج آتا ورندی ءِ ہم تس۔ ڈل چیف جسٹس آف پاکستان ءِ خیرخواہی نا جوزہ نا وڑاٹ یاتگاری شیلڈ اس پیش کرے وخت اس کہ چیف جسٹس آف پاکستان ہم ڈل ءِ شیلڈ اس پیش کرے۔
