اسلام آباد۔ 04 فروری (اے پی پی) بنجائی وزیر انفارمیشن ٹیکنالوجی و ٹیلی کمیونیکیشن سید امین الحق پارینے کہ بنجائی وزارت آئی ٹی و ٹیلی کمیونیکیشن نا راہشونی ٹی گلگت بلتستان ءِ ہم ڈیجیٹلائزڈ کننگ نا عزم ءِ، گلگت بلتستان نا مخلوق خاص وڑاٹ ورناانگا مارک و مسن تیٹی لائخی و قابلیت نا کمتی اف ہنداخاطر آن است خواہی ءِ کہ دا زیباانگا ڈیہہ نا مخلوق نا لائخیک جہانی کہول آ روشنا س مریردامسخت کن ڈیجیٹلائزیشن عمل ءِ ترند کننگ کن ہرممکن کمک فراوان کننگ انگ ءِ۔ گلگت سافٹ ویئرٹیکنالوجی پارک دانا اسہ روشناءُ دروراسے۔ اوداہیت ءِ جمعہ نادے آ تینا دفتر اٹی گلگت بلتستان نا وزیر آئی ٹی حسین شاہ و وزیر سیل و سوات و گوازی راجہ ناصر علی خان تون اوڑدہی ٹی پارے۔ داوخت آ گلگت بلتستان اٹی موبائل و براڈ بینڈ و سیل و سواتی ہند آتیا فورجی سروس و ایلو ڈٹ آتا بابت سرجم گپ وتران کننگا۔ سید امین الحق پارے کہ گلگت بلتستان اٹی ترند انگا انٹرنیٹ سروس نا فراوانی ناڈٹ آتیا ترندی اٹ کاریم برجاءِ، دامسخت کن مہالو آن خلوک 2 جی ٹاورز نا تھری و فورجی آ گدریفنگ اہم گام اس ئس داسہ مر مر انگا علاقہ غاتسکان آسراتی تا فراوانی کن گام گیج کننگ انگ ءِ وخت اس کہ وزیراعظم عمران خان نا سیل وسوات نا مون آ دننگ نا ویژن نا رداٹ گلگت بلتستان اٹی اہم سیل و سواتی ہند آتیا ہلہلہ ئی بنداو تیا فورجی سروس آتا فراوانی کن ڈٹ آتا بناءِ کننگانے، ہرافتا پوروی آن سیل وسوواتی و ہندی آبادی ءِ بے پناہ آسراتی و آسانی فراوان مریک۔سید امین الحق گلگت بلتستان نا الس نا پن تینا کلہو اٹی پارے کہ او خاطر جمع تخراونا وزارت نا بابت ہرا امور و آسراتی ممکن ءِ اونا بھرم تے اوفتسکان ضرور سرکننگک۔ داوخت آ گپ وتران کرسا گلگت بلتستان نا وزیر آئی ٹی حسین شاہ پارے کہ وخت اتون اوار اوار ننا علاقہ نا مخلوق نا لائخی تا دنیا معترف ءِ یقینا داٹی اہم کڑد آئی ٹی و ٹیلی کام نا دا آسراتی تا ءِ ہرا بنجائی وزارت آئی ٹی نا رداٹ اسپیشل کمیونیکیشن آرگنائزیشن و وزارت نا کنڈآن براہ راست کمکاری نا دروشم اٹ ملنگ ءِ۔
