اسلام آباد۔ 04 فروری (اے پی پی) سینیٹ اٹی قائد ایوان سینیٹر ڈاکٹر شہزاد وسیم پارینے کہ ساڑی حکومت کشمیر نا ویل آ جہانی کہول آ پبی وڑاٹ تالان کرینے، پاکستان نا کنڈآن پیش کروک ڈوزیئرزآن بھارت نا مکروہ چہرہ پاش مس، اقوام متحدہ نا سیکرٹری جنرل وچندی جہانی راہشونک پاکستان نا موقف و کشمیری تا حق خودارادیت نا مخ تفیءِ کریر ، جہانی برادری بھارت آ 5 اگست 2019 ء آ کروک آ گام گیج آتے پدی ہلنگ کن زور شاغے۔ جمعہ نادے آ بڑزکو ایوان نا دیوان اٹی یوم یکجہتی نا وخت آ غیرکانودی وڑاٹ بھارت نا کوزہ گیری ٹی مقبوضہ و جموں وکشمیر نا ساڑی حالیت آتے شرہ کننگ ناتحریک آ شرہ ٹی بشخ ہلسا سینیٹر ڈاکٹر شہزاد وسیم پارے کہ قوم 5 فروری آ یوم یکجہتی کشمیر اڈتننگ ءِ ایوان آن کشمیری ایلم تے یکجہتی نا کلہو اس کاہک، پاکستان وکشمیر نا جون و جسم، انسانیت ، مہرومریبت و ایلمی نا رشتہ ءِ، کشمیر پاکستان نا شہ رگ ءِ، جہانی جھیڑہ غان ہرانا ایسر کشمیری الس نا است خواہی تا رداٹ حق خودارادیت آن بیدس ناممکن ءِ، کشمیر آ بھارتی کوزہ آن اینو اسکان بھارتی ظلم برجاءِ، 9 لکھ بھارتی فوج ساڑی مننگ نا سوب آن زندان جوڑ مسنے، کشمیری ورنا، لمہ ، ایڑک قربانی ترسا آجوئی نا عمل ءِ بڑز تخانو۔ اوپارے کہ 5 اگست آ 370 و 37 اے ءِ بھارتی آئین آن حذف کننگک، ہندوتوا نا فلسفہ نا رداٹ اسرائیلی وڑآ کشمیر اٹ ہندوتے رہینگ انگ نا کوشست کننگک، 4.2 ملین بندغ ءِ غیرکانودی ڈومیسائل جاری کننگک، کشمیری تیا ہندن ءُ ظلم کننگک ہراڑآ انسانیت شکی مریک۔ اوپارے کہ وزیراعظم عمران خان نا کماشی ٹی حکومت کشمیری تتون یکجہتی نا کلہو تس، وزیراعظم کشمیر نا سفیر مرسا نشان تس۔ او اقوام متحدہ نا جنرل اسمبلی ٹی کشمیر نا مقدمہ ءِ پبی وڑاٹ پیش کرے۔ اوپارے کہ بھارت ظلم انا کمک اٹ کشمیری تا جہد آجوئی ءِ توننگ کپک، بھارت 5 اگست 2019 ء نا غیرکانودی گام گیج آتے پدی ہلے، دنیا مقبوضہ کشمیر اٹی بھارتی ظلم ءِ توننگ کن گام گیج کے، جعلی ڈومیسائل آتے منسوخ کننگے، کشمیری تا حق خودارادیت ءِ پک کننگے۔
