لاہور۔ 04 فروری (اے پی پی) وزیر ریلویز محمد اعظم خان سواتی نا کماشی ٹی جمعہ نادے آ ریلوائی ہیڈکوارٹر ز لاہور اٹی بڑزکو کہول انا دیوان اس اڈہلک ہراٹی سیکرٹری و چیئرمین ریلویز حبیب الرحمان گیلانی ، چیف ایگزیکٹیو آفیسر ریلویز نثار احمد میمن تون اوار ایلوسینئر آفیسر آک بشخ ہلکر۔ دیوان اٹی ذیلی ادارہ پراکس نا کارکڑد و آخبت نا ڈٹ آتیا حوال تننگا۔ دیوان ءِ ٹریک آ بے گرج اڑاند آتا چٹفنگ، ٹرین سیفٹی ، واپڈ انا کمک اٹ بجلی نا میٹرآتا خلنگ، ریلوائی سگنلنگ سسٹم نا بابت امور نا بارواٹ ہم معلومدار کننگا۔ داوخت آ وزیر ریلویز اعظم خان سواتی ایگزیکٹیو ڈائریکٹر پراکس ءِ پارت کرے کہ او آجووڑاٹ کاریم کے و میرٹ ءِ پک کننگے۔ اوپارے کہ پاکستان ریلوائی نا ریونیو ءِ ودفنگ کن ہرممکن گام گیج کننگے۔ اعظم سواتی مستی پارے کہ محکمہ ٹی گچینی اتنگ کن اگہ اوپن مارکیٹ آن پروفیشنلز نا گرج مرے تو اونا بلاتاخیر بست وبند ءِ کننگے۔ اوپارے کہ او ریلوائی نا کارکڑد اٹ پیدوار بدلی اس ہِننگ خواہک، ننا عزم ءِ کہ نن الس ءِ گچین و آب اٹ ریلوائی سروس اس فراوان کینہ۔ اوریلوائی آفیسر آتے پارت کرے کہ تینا کاریم ءِ عبادت تکسا کیر و دنیا ٹی رواج ریلوائی نا گچین پریکٹس نا تقلید کننگے۔ وزیر ریلویز مستی پارے کہ ٹریک آ عارضی اڑاند آتا چٹفنگ کن گچین گام گیج کننگے، بوگس پاسز و بیدس ٹکٹ سفر نا رجحان آتے چٹفنگ کن گچین حکمت عملی اس تینا کننگے۔ اوپارت کرے کہ ریونیو نا بابت ہرہفتہ وزارت ءِ رپورٹ پیش کننگے۔
