اسلام آباد۔ 04 فروری (اے پی پی) پاکستان و چین جمعہ نادے آ چین پاکستان اقتصادی راہداری (سی پیک) نا رداٹ صنعتی کمکاری نا فریم ورک معاہدہ غا دستخط کریر۔ معاہدہ غا وزیر مملکت و چیئرمین زرکاری بورڈ محمد اظفر احسن و چیئرمین نیشنل ڈویلپمنٹ اینڈ ریفارم کمیشن ہی لی فنگ دستخط کرینو۔ صنعتی کمکاری آ اسیجائی ورکنگ پڑک (جے ڈبلیو جی) نا مسخت براہ راست درملکی زرکاری ءِ راغب کننگ، صنعت کاری و اقتصادی زون تا شونداری ءِ مون آ دننگ و السی و نجی بشخ ہڑتوم آتے ٹی ڈٹ آتا بنا، ڈٹ بندی، عملدرآمد و چاروکی کننگ ءِ۔ جے ڈبلیو جی نا رداٹ چین اتون پاکستان اٹ پیدواری، صنعتی میدان، برآمد آتیٹی ودکی کننگ ءِ۔ 2018 ٹی سی پیک نا 8 می جے سی سی دیوان اٹی ہڑتوم آ فریق آک اسہ مفاہمت اسے نا یات داشت آ دستخط کریسر ہراٹی صنعتی کمکاری نا دنگ انا رداٹ فریق آتا نیام اٹ آخبت نا بابت لائحہ عمل طے کریسر۔ سی پیک تینا ارٹ میکو ریسہ ٹی پترینگانے ہراٹی خصوصی اقتصادی زون تا شونداری و صنعت کاری ءِ مون آ دننگ آن بیدس توانائی و بنداوی ڈھانچہ جات ہم اوار ءِ۔ زرکاری بورڈ انا پدریسہ کوشست آتیان ہڑتوم آ فریق آک 2020 اٹی ساڑی مفاہمت نامہ ءِ اسہ فریم ورک معاہدہ سے ٹی بدل کننگ آ امنا کریسر۔ فریق آتا گیشتر سلابت و وزیراعظم نا منظوری آن پد زرکاری بورڈ نومبر 2020اٹی این ڈی آر سی اتون ڈرافٹ فریم ورک نا تبادلہ کرے ہرادے سی پیک فیز ٹو ءِ مون آ تخسا تیار کننگاسس۔ فریم ورک معاہدہ غا دستخط نا دود وزیراعظم نا دورہ چین نا اسہ اہم ءُ بھرم اسے۔
