اسلام آباد۔ 03 فروری (اے پی پی) چیئرمین سینیٹ محمد صادق سنجرانی تون بنجائی محتسب اعجاز احمد قریشی پارلیمنٹ ہاؤس اٹی اوڑدہی کرے۔ چیئرمین سینیٹ اعجاز احمد قریشی ءِ بنجائی محتسب نا زمواری تے سنبھالنگ آمبارکبادی تس۔ سینیٹ سیکرٹریٹ نا رداٹ چیئرمین سینیٹ دا اومیت نا درشانی ءِ کرے کہ بنجائی محتسب تینا آزموندہ و مدبر حکمت عملی آن دمدستی و اڑزآن انصاف نا فراوانی ٹی اہم ءُ کڑد اس ادا کیک۔ اوپارے کہ ہرملک انا شونداری و شونہالی کن اڑزآن و دمدستی انصاف نا فراوانی اہم ءُ کڑد اس ادا کننگ کیک، لس بندغ نا ویل آتا دمدستی ایسرہرحکومت نا اولیت مریک، الس ویل آتا ایسری کن محتسب کون آ گچین ادارہ تون رجوع کے۔ اوپارے کہ دمدستی و اڑزآن انصاف نا فراوانی ٹی بنجائی محتسب نا کڑد بے مٹ مسنے، الس ءِ اڑزآن و دمدستی انصاف فراوان کننگ کن پارلیمنٹ و خاص وڑاٹ بڑزکو ایوان گچین کانود سازی کرینے، دمدستی و اڑزآن انصاف نا فراوانی کن گام گیج کرسا پدسلوک تپہ غاتے شونداری نا مرکزی دنگ اٹ اتنگ مریک۔ چیئرمین سینیٹ پارے کہ السی غاو تا گچین ایسری کن پوسکن آ ٹیکنالوجی ءِ کاریم اٹ اتنگے، بنجائی محتسب نا کنڈآن ویل آتا ایسری و دمدستی انصاف نا فراوانی کن کروک آگام گیج ستاکڑزک۔ اعجاز احمد قریشی محمد صادق سنجرانی ءِ ملک اٹ اڑزآن و دمدستی انصاف نا فراوانی نا بابت کروک آ گام گیج آتا بارواٹ سرجمی اٹ معلومدار کرے۔ اعجاز احمد قریشی پارے کہ بنجائی محتسب اٹ ہرغاونا فیصلہ ءِ 60 دے اٹ کننگک ، 2021اٹی اسہ لکھ 6 ہزار آن زیات غاوتافیصلہ کننگا، بنجائی محتسب نا 95 درسد فیصلہ غاتیا عملدرآمد مسنے۔ اوپارے کہ بنجائی محتسب اٹ پیشن نا ملک رہینگوک آ پاکستانی تا ویل آتا ایسری کن اسہ سہولیاتی کمشنر سیل اس جوڑ کننگانے، پاکستان نا غٹ جہانی بالی پٹ آتیا یکجا سہولیاتی ہند ہم جوڑ ءِ، سال 2021اٹی بنجائی محتسب پیشن نا ملک پاکستانی تا 54 ہزار غاوتاازالہ ءِ کرے۔ اوپارے کہ چناتا حق انا رکھ اکن بنجائی محتسب اٹ اسہ خصوصی ءُ سیل اس چناتے کن جوڑ کننگانے۔ بنجائی محتسب الس ءِ اڑزآن و دمدستی انصاف نا فراوانی ءِ پین گچین کننگ نا باوری کرفے۔ بنجائی محتسب اعجاز احمد قریشی چیئرمین سینیٹ محمد صادق سنجرانی تون اونا ایلم نا کزیت آ ہڑزخواہی نا درشانی ءِ کرے۔ اوڑدہی ٹی بنجائی وزیر سائنس ٹیکنالوجی سینیٹر سید شبلی فراز ہم ساڑی ئسک۔
