اسلام آباد۔ 03 فروری (اے پی پی) پاکستان و سعودی عرب 2005نا زمی جمب آن زہمی علاقہ غاتیٹی بحالی نا پدتموک ڈٹ آتیا کاریم نا رفتار ءِ ترند کننگ و پاکستان کن موخرادائیگی آ تیل انا فراوانی ءِ زوت بناکننگ کن گام گیج آتیان امنا کرینو۔ داہیت ءِ بنجائی وزیر اقتصادی امور عمرایوب خان و پاکستان اٹ سعودی عرب نا سفیر نواف بن سعید المالکی نا نیام اٹ اوڑدہی ٹی پاننگانے۔ اوڑدہی ٹی پاکستان و سعودی عرب نا نیام اٹ ہڑتوم آ کنڈآتا اقتصادی کمکاری نا جاچ ءِ ہلنگا۔ فریق آک برجا شونداری ڈٹ آتے زوت پورو کننگ و پوسکن آ ڈٹ آتیکن گام گیج آتیا امنا کریر۔ ہڑتوم آ راہشونک 2005 نا زمی جمب آن زہمی علاقہ غاتیٹی بحالی نا پدتموک ڈٹ آتیا کاریم نا رفتار ءِ ترند کننگ وپاکستان کن موخر ادائیگی آ تیل انا فراوانی ءِ زوت بناکننگ آہم امنا کرینو۔ سعودی عرب نا سفیر پارے کہ سعودی عرب پاکستان نا راجی و اقتصادی شونداری ٹی زیات سوگو کڑد ادا کننگ اٹ سنبرینگوکءِ۔ بنجائی وزیر سعودی سفیر نا گرمجوشی اٹ خیرمقدم ءِ کرسا پارے کہ سعودی عرب و پاکستان نا نیام اٹ دیرینہ دوستانہ تعلقداری ءِ۔ سعودی عرب پاکستان نا راجی و اقتصادی شونداری ٹی مدام تینا کڑد ءِ ادا کرینے۔ اوپارے کہ پاکستان سعودی عرب تون تینا تعلقداری تے بھاز اہمیت ایتک انتئے کہ ہڑتوم آ ملک آک مذہبی ، دودوربیدگی وتاریخی رشتہ غاتیٹی تفوک ءُ۔
