وزیراعظم عمران خان نا دورہ چین ملک انا زرگزرانی شونداری کن اہم ءُ دورہ اس مریک، وزیرخزانہ شوکت ترین

اسلام آباد۔ 03 فروری (اے پی پی) بنجائی وزیر خزانہ و محصولات شوکت ترین پارینے کہ وزیراعظم عمران خان نا دورہ چین نئے بیرہ سیاسی اہمیت تخک بلکن دا ملک انا زرگزرانی شونداری کن ہم اہم ءُ دورہ اس مریک۔ چین مچ آ دنیا ٹی تینا انڈسٹری خلنگ ءِ اوفتے پانہ کہ پاکستان اٹ ہم زرکاری کیر۔ اوداہیت ءِ چین آ روانہ مننگ آن مست میڈیا تون خصوصی گپ وتران کرسا پارے۔ وزیرخزانہ پارے کہ آئی ایم ایف نا کنڈآن پاکستان کن ششمیکو قسط منظور مسنے ہرا زرگزران کن ستاکڑزک۔ آئی ایم ایف ساڑی حکومتی زرگزرانی پالیسی تیان امناءِ۔ انشاء اللہ داڑآن نناکرنسی و زرگزران اٹ سوگوی بریک۔ شوکت ترین پارے کہ وزیراعظم عمران خان داسہ چین نا دورہ ءِ کننگ ءِ، دادورہ نئے بیرہ سیاسی اہمیت تخک بلکن دا ملک انا زرگزرانی شونداری کن ہم اہم ءُ دورہ اس مریک ۔ چین مچ آ دنیا ٹی صنعت خلنگ ءِ، چین ءِ پاکستان اٹی ہم زیات زرکاری کن پانہ۔ وزیرخزانہ پارے کہ پاکستان اٹ اقتصادی زونک تیار ءُ، داوخت آ پاکستان اٹ زرکاری کن بھاز انگاوارخواہی ساڑی ءِ۔ وزیراعظم عمران خان تینا چین نا دورہ ٹی کشاری ٹرانسفرمیشن ڈٹ انا بابت ہم گپ وتران کیک۔ اوپارے کہ کشت وکشار ننا زرگزرانی شونداری ٹی تمبہ غانبار ءِ و ساڑی حکومت کشت وکشار نا شونداری کن جامع گام گیج کننگ ءِ۔ دا گام گیج آتا سوب آن اینخو سال فصل آتا ریکارڈ نا پیدوار گمانی ءِ۔