اسلام آباد۔ 03 فروری (اے پی پی) بنجائی وزیر خزانہ و محصولات شوکت ترین پارینے کہ 5 آن ہلیس 6 درسد نا پائیدار نمو نا حالیت اٹ پاکستان ءِ آئی ایم ایف نا پین پروگرام اسے نا گرج مفک، ملک جامع و پائیدار ودکی نا کنڈآ ہِننگ ءِ، حکومت بچت و کفایت شعاری آ یخین تخک و بروک آ بجٹ اٹ نن تینا خڑچ آتا مون ءِ توننگ نا کوشست کینہ۔ اوداہیت ءِ بلوم برگ ءِ انٹرویو ترسا پارے۔ وزیرخزانہ شوکت ترین پارے کہ پاکستان کثیر الجہتی وام فراوان کروک آ تیا سیبو ءِ چٹفنگ خواہک، دامسخت کن مالیاتی و واپاری نسخان اٹی کمتی و تینا سرمایہ نا منڈی تا حقی کچ آن فائدہ ہرفنگ نا پالیسی آ ہِننگ ءِ انتئے کہ ہندا حالیت اٹ پاکستان پائیدار اقتصادی نمو نا کنڈآ ہِننگ کیک۔ وزیرخزانہ پارے کہ بجٹ نسخان ءِ 6.1 درسد آن کم کرسا 5 آن ہلیس 5.25 درسد نا کہول آ اتنگ و داڑتون اوار جی ڈی پی نا نمو ءِ 5 درسد آن ودفسا 6 درسد کننگ ننا ہدف ءِ۔ ننا خیال ءِ کہ دا پروگرام (آئی ایم ایف پروگرام ) گنج اسے۔ اگہ نن 5 آن ہلیس 6 درسد اسکان نمو دوئی کینہ، ہراکہ اسہ پائیدار نمو اسے، تو کنا خیال اف ک ننے جہانی مالیاتی فنڈ انا پین پروگرام اسے نا گرج مریک۔ وزیرخزانہ پارے کہ پاکستان مارچ اٹی ای ایس جی کمپلئینٹ یورو بانڈ آن اسہ ارب ڈالر یکجا کننگ نا ڈٹ جوڑ کرینے، تدوک آ ہفتہ پاکستان سکوک آن اسہ ارب ڈالر یکجا کریسس۔ اوپارے کہ زرگزران اٹ پائیدار نمو نا ہدف نا دوئی کننگ کن پاکستان تینا برآمد آتیٹی ودکی کن گام گیج کننگ ءِ، اسٹیٹ بینک دا رداٹ مینو فیکچررز ءِ اڑزآن و آسان وام تا آسراتی تسنے، حکومت بجلی نا نہاد ءِ ڈیہہ نا رداٹ کرینے۔ ننا برآمد آتا نیمہ بشخ ٹیکسٹائل مصنوعات آتیا تالان ءِ، حکومت ٹیکسٹائل مصنوعات آتا برآمد آتیکن جامع گام گیج کرینے، اینخو سال ٹیکسٹائل مصنوعات آتا برآمد 40 درسد ودکی اتون 21 ارب ڈالر آن گدرینگک وخت اس کہ بروک آ مالی سال اٹی ٹیکسٹائل مصنوعات آتا برآمد 26 ارب ڈالر مریک۔ وزیرخزانہ پارے کہ پاکستان ٹیکنالوجی نا بشخ ءِ ہم ہنداوڑ نا آسراتی و ترغیب تننگ نا ارادہ تخک، نن سٹارٹ اپس اٹ مون آ بروک آ جہانی ریسہ غان فائدہ ہرفنگ خوانہ دا بابت اسہ تُو انا وخت اٹی پالیسی درستی راستی کرفنگک۔ وزیرخزانہ پارے کہ حکومت اسٹیٹ بینک نا وتواجہی تون اوار پنجرجاتی اصلاحات نا عمل بناکرینے، مستین نا حکومت آک گونڈ ءُ مد اسے کن آئی ایم ایف نا شڑت آتے امنا کریر و ہراتم پروگرام چٹاکہ تو پالیسی ساز بے جا مصارف دُوارہ آن بناکریرہ، ننا حکومت بچت و کفایت شعاری آ یخین تخک و بروک آ بجٹ اٹ نن تینا خڑچ آتا مون ءِ توننگ نا کوشست کینہ۔ وزیر خزانہ پارے کہ ساڑی حکومت زرگزران نا جامع و پائیدار نمو کن المی گام گیج کننگ نا کوشست کننگ ءِ ہراتم اسہ وار نن رفتاراس ہلینہ تو کنا خیال اٹ 20 آن ہلیس 30 سال اٹی نن نمو نا کنڈآ کانہ۔
