اسلام آباد۔ 03 فروری (اے پی پی) بنجائی وزیر حوالکاری و شینکاری چوہدری فواد حسین پارینے کہ وزیراعظم عمران خان نا دورہ چین اٹی چین نا چندی کاروباری شخصیت و بھلا زرکارآتون اوڑدہی مریک، چین آن چندی کاروباری و صنعتی یونٹ پاکستان آ گدریفنگرہ، دادورہ غان پاک چین تعلقداری تا ودفنگ اٹ پین ودکی مریک۔ داہیت ءِ او پنچ شنبے نا دے آ داڑے وزیراعظم عمران خان نا دورہ چین نا بابت تینا اسہ ویڈیو بیان اسے ٹی پارے۔ چوہدری فواد حسین پارے کہ وزیراعظم عمران خان اینو بڑزکو کہولی ڈل اتون اوار چین نا اہم دورہ غا روانہ مننگ ءِ، تینا دورہ چین اٹی وزیراعظم عمران خان چین نا صدر شی جن پنگ تون اوڑدہی کیک، صدر شی جن پنگ اِراسال آن پد جہانی راہشون اسے تون اوڑدہی کیک ہرا وزیراعظم عمران خان مریک۔ اوپارے کہ وزیراعظم نا دورہ چین نا مسخت سرمائی اولمپکس اٹ پاکستان نا نمائندگی و اونا بنائی دود اٹی پاکستان نا خیرخواہی نا جوزہ ءِ سرکننگ ءِ۔ اوپارے کہ داوخت آ 20 ایلو ملک آتا سروک آک ہم چین اٹی ساڑی مریرہ۔ وزیراعظم نا چین نا چندی کاروباری شخصیت آتون اوڑدہی ہم مریک، دادورہ غان پد چین آن کیہی کاروباری و صنعتی یونٹ پاکستان آ منتقل مریرہ۔ اوپارے کہ وزیراعظم عمران خان نا چین نا صدر و وزیراعظم تون ہم جتا جتا اوڑدہی آن بیدس چین نا بھلا زرکارآتون اوڑدہی ہم طے ءِ۔ دادورہ ہمالیہ آن بڑز و بحیرہ عرب آن کڑمب پاک چین تعلقداری نا ودکی ٹی پین ودکی کیک۔
