اسلام آباد۔ 02 فروری (اے پی پی) سپریم کورٹ آف پاکستان نا سینئر انگا جج جسٹس عمر عطابندیال 28 می چیف جسٹس آف پاکستان نا وڑاٹ تینا عہدہ نا سوغند ہرفے۔ چارشنبےنادے آ ایوان صدر اٹی اڈ ہلوک آ اسہ پروقار ءُ دود اسے ٹی صدر مملکت ڈاکٹر عارف علوی اوڑآن سوغند ہلک۔ دود اٹی وزیراعظم عمران خان خصوصی وڑاٹ بشخ ہلک۔ وخت اس کہ دود اٹی ایلو بشخ ہلوک آتے ٹی اسپیکر قومی اسمبلی اسد قیصر، ڈپٹی اسپیکرقاسم خان سوری، بنجائی وزیر حوالکاری و شینکاری چوہدری فواد حسین، وزیرخارجہ مخدوم شاہ محمود قریشی ، بنجائی وزیر کانود و انصاف بیرسٹر ڈاکٹر نسیم فروغ تون اوار ایلو بنجائی وزیر آک ، وزیر مملکت آک ، پارلیمنٹ نا باسک آک ، جج صاحب آک ، وکیل تنظیم تا عہدیدار آک و سول و فوجی کمامدارآک اوار ئسر۔ داوخت آ جسٹس عمر عطابندیال نا بطور چیف جسٹس تعیناتی نا نوٹیفکیشن ءِ خوانسا بنفنگا۔ صدر مملکت ڈاکٹر عارف علوی سپریم کورٹ نا سینئر انگا جج جسٹس عمرعطابندیال ءِ چیف جسٹس آف پاکستان مقرر کرے۔ اونا تعیناتی نا نوٹیفکیشن 2 فروری آن نافذ العمل ءِ۔ اونا پیشرو چیف جسٹس آف پاکستان جسٹس گلزارحسین یکم فروری آ تینا ملازمت نا مد ءِ پورو مننگ آن پد دزکش مسوسس۔
