اسلام آباد۔ 02 فروری (اے پی پی) بنجائی وزیر داخلہ شیخ رشید احمد پارینے کہ اپوزیشن اٹ دُن ءُ وس اف، وزارت داخلہ اسہ سال اٹی نادرا نا 87 پوسکن ءُ سینٹر ملا، سعودی وزیر داخلہ پرنس عبدالعزیز بن سعود بن نائف وزارت داخلہ نا سلہ غا پاکستان نا دورہ ءِ کیک، سعودی عرب تون ننا رشتہ ہمالیہ غان ہم بڑز ءِ، سعودی عرب و پاکستان یکجان اِرا است ءُ، سعودی وزیرداخلہ وزیراعظم پاکستان و صدر مملکت تون ہم اوڑدہی کیک، وزیراعظم عمران خان 3 فروری آ چین نا تاریخی دورہ ءِ کیک، ساڑی جہانی حالیت آتا بابت سی پیک و ایلو باندات آتیا سجفنگک، پنچ فروری آ یوم یکجہتی کشمیر ءِ پبی وڑاٹ اڈتننگک۔ داخیال آتا درشانی ءِ او چارشنبے نادے آاسلام آباد اٹی وزارت داخلہ میڈیا سینٹر اٹی اہم پریس کانفرنس آن تران کرسا کرے۔ اوپارے کہ لال حویلی ٹی ہم یوم یکجہتی کشمیر نا دود مریک، بشخ ہلوک آتیان خواست ءِ کہ ماسک بینربریر، نواز شریف اسہ بدنصیب ءُ انسان اسے، ہرا جعلی رپورٹ آتا زی آ نرا، دنیا ٹی دُن ءُ ہچ ءُ لیڈر اس اف ہرا تینا ملک آن نرے، تینٹ کورونا نا سوب آن بفننگ ءِ و مخلوق ءِ پاہک کہ کورونا ٹی جلوس کشبو، مخلوق ءِ ناجوڑی ٹی اختہ کننگ خواہک و تینٹ اودے تینا دراخ جوڑی دوست ءِ، عمران خان پاریسس کہ مسہ تُو اہم ءُ اسہ تُو اس گدرینگانے، شست دے پین ارے ، اپوزیشن بھاز شوق اٹ اسلام آباد آ برے، اپوزیشن اٹ دُن ءُ وس اف ۔ بنجائی وزیر داخلہ پارے کہ اپوزیشن نا رنگ پشٹم توسونے، اوفتا پلگ آتیٹی کچرا ہلکونے، 27 فروری و 23 مارچ آ ہم شوق ءِ پورو کیر و زیات شوق مولانا فضل الرحمان ءِ ارے۔ عمران خان ہمو اسٹ انگا بندغ ءِ ہرااینو ہم اوغانستان اٹ مروک آ انسانیت نا ویل آتیا توار بڑز کننگ ءِ۔ شیخ رشید پارے کہ وزارت داخلہ اسہ سال اٹی نادرانا 87 پوسکن ءُ سینٹر ملا، سندھ اٹی 23، پنجاب اٹی 11، کے پی کے ٹی 16، بلوچستان اٹی 13، آزاد کشمیر اٹی ہم 13و گلگت بلتستان اٹی 10 وخت اس کہ اسلام آباد اٹی اسہ سینٹر اس اوار ءِ۔ بنجائی وزیر داخلہ پارے کہ پیشن نا ملک 13 پوسکن ءُ سینٹر اینخو نا سال جوڑ کننگک، سندھ اٹی 13 پاسپورٹ سینٹر جوڑ کننگ خوانہ دارداٹ سندھ اٹی سینزدہ جاگہ غاتا پیدواری ءِ ہم کننگانے، ہرے سندھ حکومت نا کنڈآن مننگ ءِ، پیسہ ننتون ارے، نادرا چیئرمین ءِ سندھ آ ہِننگ نا پارت کرینن، و پاسپورٹ والا تے ہم پاننگانے، غٹ چیف سیکرٹریز و آئی جی تے لیٹر نوشتہ کننگانے کہ امن و ایمنی نا حالیت آتیان الرٹ مریر، امن و ایمنی نا گڑتی تا رداٹ دُز ، چیف سیکرٹری و آئی جی تے الرٹ کرینن، اوپیدوار کرے کہ نئے صدارتی نظام اس بننگ ءِ ، نئے ایمرجنسی اس مننگ ءِ ، نئے ڈیل یا ڈھیل اس مننگ ءِ و نئے بے پتی اس مننگ والا ءِ ، بے پتی نا اگہ کس اسے شوق ارے تو اوشوق ءِ پورو کے، مسہ نیم سال اٹی سینیٹ و قومی اسمبلی ٹی اسہ بل اس ہم ہندن ءُ اف ہراٹی حکومت کٹپ۔ داوخت آ بنجائی وزیر داخلہ میڈیا نا سوج آتا ورندی ءِ ترسا پارے کہ تحریک طالبان پاکستان دہشت گردی نا واقعہ غاتیٹی ودکی کرینے، اسلام آباد اٹی اونا اِرا دہشت گرد آتے خلنگا ہرانا سوب آن ننے واردات آتے کلیو ملانے، ٹی ٹی پی ہند ن ءُ خواست کننگ ءِ ہرا گچین مروک ءُ السی حکومت اسے کن قبول کننگ ممکن اف۔ اگہ امن و ایمنی نا ویل ودی مریک تو اودے ڈیل کننگک، اسہ سوج اسے نا ورندی ٹی شیخ رشید پارے کہ وزارت داخلہ نا غٹ ادارہ غاتا انچارج صاحب آک بااختیار ءُ، ایف آئی اے ٹی ہم روٹیشن نا پالیسی مسنے ، ہنداوڑ نادرا ٹی ہم مریک، عمران خان نا خوش بختی ءِ اودے نالائخ اپوزیشن اس ملا، اوغانستان آن پنچ سد مخلوق ہڑدے بریک ، اسہ پین سوج اسے نا ورندی ٹی وزیرداخلہ پارے کہ آئی ایم ایف آ شوق اٹ کس ہنپک نن ہم بیوسی ٹی ہنان، اسہ سوج اسے نا ورندی ٹی وزیر داخلہ پارے کہ وزارت داخلہ بلغڑ وملخڑ نا جنگ آتیکن اف۔
