اسلام آباد۔ 02 فروری (اے پی پی) وزیرخارجہ مخدوم شاہ محمود قریشی نا کماشی ٹی چارشنبے نادے آ وزارت خارجہ ٹی سینٹرل کوآرڈنیشن کمیٹی قونصلر سروسز نا دیوان اڈ ہلک۔ دیوان اٹی بنجائی سیکرٹری اسٹیبلشمنٹ ، بنجائی سیکرٹری وزارت کانود و انصاف ، چیئرمین نادرا و ایلو وزارت آتا سینئر آفیسر آک بشخ ہلکر وخت اس کہ چیف سیکرٹری پنجاب ، ہوم سیکرٹری خیبرپختونخوا ویڈیو لنک انا کمک اٹ دیوان اٹ بشخ ہلکر۔ وزیرخارجہ سینٹرل کوآرڈنیشن کمیٹی نا دیوان اٹی بشخ ہلوک آتے پارے کہ وزیراعظم عمران خان ، پیشن نا ملک رہینگوک آ پاکستانی تا راجی آسراتی ٹی خاص است خواہی تخک۔ وزیراعظم عمران خان نا وژن ءِ مون آ تخسا نن قونصلر سروسز نا بابت بھاز انگا مثبت بدلی درستی راستی کرفینن، دا بابت وزیراعظم عمران خان نا کماشی ٹی اسہ اہم ءُ دیوان اس اڈ ہلک۔ شاہ محمود قریشی پارے کہ ننا بھاز انگا سفیر آک دا دیوان اٹی ورچوئل بشخ ہلکر و پیشن نا ملک رہینگوک آ پاکستانی تے تروک آ قونصلر خذمت آتا سرجم آتیان معلومدار کرے۔ اوپارے کہ وزیراعظم عمران خان صاحب نا خصوصی پارت آ سینٹرل کوآرڈنیشن کمیٹی قونصلر سروسز اس ٹہیفنگا ہرانا اینو اولیکو دیوان اڈ ہلنگ ءِ۔ قونصلر سروسز اٹی مشین ریڈایبل پاسپورٹ نا بنا، قومی شناختی کارڈ انا پوسکنی، ویزا سروسز ، شہریت نا پک، ایمرجنسی سفری دستاویز آتا اجراتون اوار بھاز انگا خذمت آک اوار ءُ ہرامچ آ دنیا ٹی ننا سفارت خانہ، پیشن نا ملک رہینگوک آ پاکستانی تے فراوان کننگ ءِ۔ وزیر خارجہ پارے کہ قونصلر سروسز نا گچین فراوانی کن غٹ تعلقدار وزارت آتا نیام اٹ خڑکی رابطہ بھاز اہمیت تخک۔ کنا پارت آ، ننا غٹ سفیر آک پیشن نا ملک رہینگوک آ پاکستانی تے مون تروک مشکل آتا وخت آ ازالہ کن باقاعدگی اٹ ’’ای کچہری ‘‘ اڈتننگ ءُ۔ پیشن نا ملک رہینگوک آ پاکستانی تے آسراتی فراوان کننگ کن پاور آف اٹارنیز نا پک کننگ ءِ آن لائن کننگانے۔ چیئرمین نادرا طارق ملک وزیرخارجہ ءِ نادرا نا کنڈآن پاکستانی سفارت خانہ غاتیٹی پوسکن ملوک آ نادرا کاؤنٹر ز و پیش کروک خذمت آتا سرجم آتیان معلومدار کرے۔
