اقوام متحدہ۔ 02 فروری (اے پی پی) پاکستان جھیڑہ غاتیان زہمی ملک آتیٹی امن نا کوشست آتا مخ تفی ءِ کروک آ اقوام متحدہ نا امن سازی کمیشن (پی بی سی) آ زور شاغانے کہ او جھیڑہ و بے چیٹی تا بنداوی سوب آتا ایسری ٹی تینا پبی کڑد ءِ ادا کے۔ اقوام متحدہ ٹی پاکستان نا آخبتی مندوب منیر اکرم کمیشن نا شش میکو سیشن اٹ تینا تران نا بنائی ہیت وگپ آتے ٹی پارے کہ جھیڑہ غاتا بنداوی سوب نیزگاری، بے بریبری، گونڈ وسیلہ غاتیا مسابقت، چاگڑدی انحطاط و ایسر مفروک جھیڑہ غاتے ایسر کننگ ءِ بایدے اولیت تننگے۔ اوپارے کہ دا غٹ الس قوم تا نیام اٹ و اوفتا تہہ ٹی جھیڑہ غاتا سوب آک ءُ ہنداخاطرآن کمیشن دا بنداوی سوب آتا ایسری ٹی کمکاری کن پین کڑد ادا کننگ کیک۔ اوپارے کہ اقوام متحدہ نا امن سازی کمیشن (پی بی سی) نا سلابتی کڑد اودے سلامتی کونسل اٹ امن، جھیڑہ غاتا ایسر و اہم ویل آتا بابت پبی معلومداری و سلاہ و سوج پیش کننگ نا موکل ایتک۔ اوپارے کہ جھیڑہ غاتا وڑ بدل مسنے، ہندی جھیڑہ غاتیٹی درملکی نیام تمنگ ودانے و داسہ تہہ نا جھیڑہ غاتا ہم سیم پار اثر مرتب مریک۔ اوپارے کہ ننے دا حقیقت ءِ ہروئی ءِ کہ قدرتی وسیلہ غاتا دوئی کننگ اٹ مالی فائدہ اوار مرے۔ اوتینا بنگلہ دیشی ہم منصب رباب فاطمہ ءِ کمیشن نا چیئرپرسن گچین مننگ آمبارکبادی تس، ہرا 2005 اٹی اونا جوڑ مننگ آن پد دا عہدہ دوئی کروک آ اولیکو زالبول ءِ۔ پاکستان دا سلابتی باڈی نا بانی باسک ءِ۔ پاکستانی مندوب منیر اکرم پارے کہ کمیشن تینا رابطہ و تینا قول آتا جغرافیائی دنگ ہڑتوم آتے ودفینے۔ اوپارے کہ کمیشن ءِ اقوام متحدہ نا ادارہ، نجی بشخ و پیس بلڈنگ فنڈ اتون تینا پبی کڑد ءِ ادا کے۔ و ساڑی کمکاری ءِ مریس مدتی قول آتیٹی بایدے بدل کے۔
