کوئٹہ۔ 02 فروری (اے پی پی) میڈیکل سپرنٹنڈنٹ بولان میڈیکل ہسپتال کوئٹہ ڈاکٹر سلطان احمد لہڑی پارینے کہ ہسپتال اٹی الس ءِ درمان نا فراوانی حکومت نا اولیت آتیٹی اوار ءِ ہراٹی ڈیوالئی ءِ سگنگ پننگک، ڈاکٹرآک، پیرامیڈیکل اسٹاف و نرس آک ہسپتال اٹی درمان نا غرض اٹ بروک آ ناجوڑ و اوفتا خاہوت آتون جوانی اٹ پیش بریر۔ داہیت ءِ او سے شنبے و چارشنبے نا نیامی نن ہسپتال نا چندی وارڈ آتا اناگت دورہ ءِ کننگ نا وخت آ گپ وتران کرسا پارے ۔ داوخت آ آرایم او نائٹ ڈاکٹر خالد جاوید، مین فارمیسی نا انچارج ڈاکٹر میر احمد مینگل ئسک ہم ساڑی ئسر۔ ڈاکٹر سلطان احمد لہڑی پارے کہ بولان میڈیکل ہسپتال اٹ ناجوڑ آتے درمان نا مفت آسراتی تا فراوانی کن غٹ دوئی وسیلہ غاتے کاریم اٹ اتنگ انگ ءِ۔ اوپارے کہ ڈاکٹر آک الس کن بھلو حیثیت اس تخرہ اوفتے مرے کہ او ہسپتال اٹ درمان نا غرض اٹ بروک آ ناجوڑ آتے ہرممکن آسراتی تا فراوانی ءِ پک کیر۔ اوپارے کہ ڈاکٹرآک، پیرامیڈیکل اسٹاف ، نرس و ایلوعملہ تینا ڈیوٹی تیا حاضری ءِ پک کیر غیرحاضری ءِ سگنگ پننگک اگہ ملازم اس غیر حاضر خننگا تو اونا برخلاف کارروائی کننگک۔ ڈاکٹر سلطان احمد لہڑی چندی وارڈ آتا دورہ ٹی ناجوڑ آتے درمان نا تروک آ آسراتی تا فراوانی آ است جمی نا درشانی ءِ کرے۔
