کوئٹہ۔ 02 فروری (اے پی پی) خدمت خلق کمیٹی کلی لعل آباد محمد حسنی نا سروک حاجی خیر جان بنگلزئی نا کماشی ٹی چارشنبے نادے آ اسہ دیوان اس اڈ ہلک ہراٹی خدمت خلق کمیٹی کلی لعل آباد نا منشاکار عبدالرحیم محمد حسنی، امیر حمزہ محمد حسنی، بشیر احمد شاہوانی، مقبول احمد ساتکزئی، سعداللہ محمد حسنی، لعل محمد رئیسانی، سہیل احمد رئیسانی، عبیداللہ محمد حسنی، عبدالوحید محمد حسنی ، ناصر محمد حسنی، عبدالغفور محمد حسنی، عبدالحق محمد حسنی، محمدرفیق محمد حسنی و ایلوفک بشخ ہلکر۔ داوخت آ خدمت خلق کمیٹی کلی لعل آباد نا سروک حاجی خیرجان بنگلزئی پارے کہ غٹ آن گچین و جوان انگا انسان ہمودے ہراایلوفتے فائدہ ایتے و تکلیف تف، نیزگار، مسکین و لس مخلوق نا است آتے ٹی خوشی تالان کے اوفتا زند ءِ غم تیان پاک کننگ کن کوشست کے ، اوفتے اگہ کمک نا گرج مرے تو اوفتا کمک ءِ کے و اگہ او ہچ اس کننگ کپک تو کم از کم اوفتے تون جوانی اٹ ہنین ءُ ہیت اس کے ۔ اوپارے کہ خدانا مخلوق نا خذمت ءِ کننگ اوفتا کاریم اٹ بننگ، اوفتا مشکل آتے مرکننگ، اوفتا دڑد و ڈکھیائی ءِ بشخنگ او فتے تون ہمدردی و غم خواری و شفقت کننگ آ شریعت اخس زور شاغانے دا خدمت خلق و شفقت علی الخلق اخہ در بھلو نیکی و اخہ در بھلو عبادت اسے الس نا خذمت آن انسان نئے بیرہ مخلوق نا است آتے ٹی بلکن اللہ تعالیٰ نا مون آ ہم بھلو عزت و شرف اس خنک، و اللہ تعالیٰ نا رضاو خڑکی نا حقدار مریک، حاجی خیر جان بنگلزئی پارے کہ اسلام اٹی اسہ گچین ءُ انسان اسے کن ہرا سفت آتا مننگ المی ءِ، اوفتیان اسہ سفت خذمت خلق انا ءِ داوڑنا سفت تخوک آ ءِ جوان ءُ انسان اس گوندنگک۔ خذمت خلق اٹ ہراکنڈآ اشارہ کننگانے اونا تعلق حقوق العباد آن ءِ۔ اوپارے کہ ننے مرے کہ نیزگار و حقدار بندغ آتا ہرممکن امداد کن مون آ برین انتئے کہ اللہ تعالیٰ ہم ایلو فتے تون نیکی نا پرمان کرینے۔
