بہاولپور۔ 01 فروری (اے پی پی) وزیراعظم عمران خان پارینےکہ مدینہ نا ریاست نا روشنا اصول آتا پیروی ءِ کرسا ساڑی حکومت کانود نا بالادستی نا حامل آسودہی ریاست اسے نا جوڑ کننگ کن کوشست کننگ ءِ، دا رداٹ راج انا نزور تپہ غاتا راجی آسراتی کن قومی جان جوڑی کارڈ و احساس پروگرام انقلابی ءُ گام گیج ءُ، قومی جان جوڑی کارڈ انا بنا آسودہی ریاست نا کنڈآ اسہ اہم ءُ گام اسے ہراڑآن جان جوڑی نا مچ آ نظام اٹ انقلاب اس بریک، داآسراتی دنیا نا شون ہلوک ملک آتیٹی ہم دوئی اف، ملک اٹ کرپشن نا چٹفنگ، کانود نا بالادستی و آسودہی ریاست نا جوڑ کننگ کن مچ آ قوم ءِ ننتون تفوئی مریک، واکدار و نزور کن جتا جتا کانود نا حامل ملک آک وسیلہ غاتیان پد ہم نیزگار ءُ، سویلی پنجاب سیکرٹریٹ نا جوڑ کننگ ساڑی حکومت نا کنڈآن سویلی پنجاب نا الس تون کروک آ قول انا پوروی ءِ۔ او سے شنبے نادے آ بہاولپور ڈویژن اٹ پوسکن آ پاکستان قومی جان جوڑی کارڈ انا بنانا دود آن تران کریکہ۔ دود آن وزیراعلیٰ پنجاب عثمان بزدار ، بنجائی وزیر مخدوم خسروبختیارئسک ہم تران کریر۔ وزیراعظم داوخت آ بہاولپور ڈویژن نا چندی علاقہ غاتیان تعلق تخوک آ بندغ آتے ٹی جان جوڑی کارڈ بشخسا پروگرام نا باقاعدہ بناءِ کرے۔ قومی جان جوڑی کارڈ انا بناخیبرپختونخوا، پنجاب، اسلام آباد، ضلع تھرپارکر، گلگت بلتستان و آزاد جموں و کشمیر اٹی کننگانے۔ بہاولپور ڈویژن اٹ اوار ضلع رحیم یارخان، بہاولپور و بہاولنگر نا اسہ کروڑ 5 لکھ آن زیات بندغ آتا اوار مننگ آن پد پنجاب اٹی قومی جان جوڑی کارڈ آن فائدہ ہرفوک آ اُرا و بندغ آتا کچ اٹی 63 درسد ودکی مریک۔ وزیراعظم تران کرسا پارے کہ او 18 سال نا وئی ٹی برطانیہ ٹی اسہ آسودہی ریاست اسے خنا، قرارداد مسخت آتے ٹی پاکستان ءِ اسلامی آسودہی ریاست اس گوندنگاولے نن داڑے اسلامی آسودہی ریاست ءِ خننگ کتون، برطانیہ ٹی ضرور آسودہی ریاست اس خنان ہراڑے ہسپتال آتیٹی انسانیت خنان، ہموڑے سرکاری ہسپتال آتیٹی پیسہ ترسا و مفت درمان کرفوک آتے ٹی ڈاکٹر و عملہ ہچ ءُ پرخ اس تختورہ۔ اوپارے کہ خواجہ نبی صلی اللہ علیہ و آلہ وسلم غٹ انسان تیکن رحمت مرسا بس، اونا سنت آ ہرکس کہ چلینگک ہموڑے برکت بریک، برطانیہ، ناروے تون اوار ایلو ملک آک آسودہی ریاست آک ءُ، مسلم دنیا ٹی اسہ ملک اس ہم ہندن ءُ اف ہرا حقی آسودہی ریاست اس مرے۔ وزیراعظم پارے کہ جان جوڑی و تعلیم نا بشخ اٹی زیات پیسہ خڑچ مریک، جان جوڑی نا بشخ اٹی سرکاری ہسپتال جوڑ کننگے، ہموڑے ڈاکٹر طبی عملہ تننگے، مفت دوائی تننگے، داڑکن بھلو زراسے نا گرج ءِ، برطانیہ نا جان جوڑی نا بجٹ پاکستان نا جم بجٹ آن زیات ءِ۔ وزیراعظم پارے کہ اوخیبرپختونخوا ٹی اولیکو دور حکومت اٹ جان جوڑی کارڈ انا آزموندہ ءِ کرے، پاکستان اٹ داوڑ مہالو اسُل سجفنگتویسس، ہنداخاطرآن ننے دا ڈٹ انا سرسہبی نا خلیس ئس نن دا ڈٹ انا سرسہبی آن پد نن مچ آ ملک اٹی قومی جان جوڑی کارڈ نابھلو گام اس ہرفین۔ وزیراعظم پارے کہ دنیا نا اسہ ملک اسے ٹی ہم یونیورسل ہیلتھ کوریج اف، شون ہلوک ملک آتیٹی مخلوق ہیلتھ انشورنس ناپیسہ ایتک، نن مچ آ پاکستان ءِ مفت دا آسراتی ءِ تننگ اُن و ہراڑے ہراڑے پی ٹی آئی نا حکومت ءِ ہموڑے قومی جان جوڑی کارڈ انابناءِ کننگ انگ ءِ۔ وزیراعظم پارے کہ ہرجاگہ غا سرکاری ہسپتال جوڑ کننگ کن ننتون وسیلہ اف وخت اس کہ آبادی ٹی ودکی نا سوب آن ہم مالی مشکل آتیان اوفتے چلیفنگ مشکل ءِ، قومی جان جوڑی کارڈ آن خلقی علاقہ غاتے ٹی ہم نجی بشخ اٹ ہسپتال جوڑ مریک، چنکا شار و خلقی علاقہ غاتے ٹی سرکاری ہسپتال آتیٹی ڈاکٹر آک ہنپسہ، داوڑنا علاقہ غاتے ٹی ہسپتال آتیا ناجوڑ آتا بھاریم زیات مریک، داسہ خلق انا کہول آ ہم ہسپتال جوڑ مریک، داجاگہ نا مخلوق تون ہم درمان کن جان جوڑی کارڈ انا حالیت اٹ پیسہ دوئی مریک۔ وزیراعظم پارے کہ دامقابلہ نا فضاآن داسہ سرکاری ہسپتال آتے ٹی ہم ڈاکٹر آتیان پوچھ گچھ مریک، داڑآن مچ آ جان جوڑی نا بشخ اٹی انقلاب اس بریک، ملکی تاریخ اٹ اولیکو وار پنجاب حکومت جان جوڑی کارڈ آ 400 ارب روپئی خڑچ کننگ ءِ۔ وزیراعظم پارے کہ مستین اٹ ننا حکمران تے جکہ اس ہم ہلککہ تو مچ آ ٹبر درمان کن پیشن نا ملک آ ہناکہ، اوفتے مخلوق نا مشکل آتا اندازہ الوکہ، ای تینا لمہ نا تکلیف ءِ خناٹ شوکت خانم ہسپتال ءِ جوڑ کریٹ۔ وزیراعظم پارے کہ ہراچنانا درمان کن لمہ و باوہ تون پیسہ مف اونا دڑد اونا لمہ و باوہ غان ہرفنگ مریک۔
