اسلام آباد۔ 01 فروری (اے پی پی) وزیرخارجہ شاہ محمود قریشی پارینے کہ اسٹیٹ بینک ءِ کس اسے نا غلامی ٹی تننگتنے، دا ادارہ پارلیمنٹ نا تابع مریک، قائد حزب اختلاف نا استیفہ اسہ راگ اسے، او اسُل تینا سیٹ ءِ اِلیپک، داسمجھوتہ کروک آ قائد حزب اختلاف ءِ، اپوزیشن باسک آک اوڑآ پت کپس، داسینیٹر ہم وونٹ آتے ہلسا جوڑ مسنے، پیپلزپارٹی (ن) لیگ اتون قائد حزب اختلاف نا تقرری ٹی ہم دوتس، سینیٹر دلاور ساف پارینے کہ قائد حزب اختلاف اودے بٹنگسا تینٹ غیب مس۔ سے شنبے نادے آ بڑزکو ایوان نا دیوان اٹی گپ وتران کرسا وزیرخارجہ پارے کہ اسٹیٹ بینک ءِ وتواجہ کننگ زرگزرانی زمواری تا بشخ اسے، پیپلزپارٹی و (ن) لیگ نا ریکارڈ گواہ ءِ کہ اوفک تینا دور اٹی ترمیم کرسا کرینو، داسہ گرج داہیت انا ئسک کہ اسٹیٹ بینک ءِ وتواجہ ادارہ اس جوڑ کننگے تانکہ حکومت آک تینا مسخت آتیکن دادے کاریم اٹ اتنگ کپس، بورڈ آف ڈائریکٹرز نا تقرری نا اختیار کابینہ و وزیراعظم تون مریک، اودے مادرپدرآجو کپننگ انگ ءِ ، نئے کس اسے نا غلامی ٹی تننگانے، داپارلیمنٹ نا تابعءِ و مریک۔ اوپارے کہ اسٹیٹ بینک نا رپورٹ پارلیمنٹ اٹ ہنداوڑ پیش کرسا کننگک۔ اوپارے کہ سینیٹ اٹی قائد حزب اختلاف دوشنبے نادے آ انتہائی غیر زموارانہ بیان تس، چیئرمین سینیٹ آ نکتہ چینی کرے، قاعدہ دانا اودے موکل تفک، اوچیئرمین آ حکومت ءِ آسراتی تننگ نا ہیت کرے، حالانکہ رولز انا رداٹ چیئرمین تینا حق ءِ کاریم اٹ ایس، قائد حزب اختلاف تینا غیرحاضری نا وضاحت ہم پیش کرے ہراڑآن الس و اپوزیشن نا حلقہ غاک است جم متور، اودے مہالو علم ئس کہ قومی اسمبلی ٹی اونا جماعت بل انا مخالفت ءِ کرینے و سینیٹ اٹی دا بل بریک، آئی ایم ایف نا دیوان نا بورڈ انا دیوان نا بابت ہم اودے پورو معلومداری ئسک، سینیٹر دلاور و آزاد اپوزیشن باسک آتے تینٹ رابطہ کرسا بٹنگا ولے تینٹ غیرحاضرمس، قائد حزب اختلاف وونٹ ہلسا سینیٹر جوڑ مسنے، داغٹ چارہ ، اونا کیس اینو ہم الیکشن کمیشن اٹ زیر سماعت ءِ، اونا مار انا ویڈیو ہم مون آ بس ہراٹی او وونٹ ہلنگ نا ہیت کریکہ۔ وزیرخارجہ پارے کہ پیپلزپارٹی (ن) لیگ تون مہالو ہم دوتسوسس و قائد حزب اختلاف نا تعیناتی ٹی (ن) لیگ نا اومیتدار ءِ وونٹ تننگ نا قول کرسا اسہ کنڈ مس۔ اوپارے کہ قائد حزب اختلاف نا عہدہ غان استیفہ ہم اسہ راگ اسے۔
