صدر مملکت آصف علی زرداری تون آزاد کشمیر نا مسکوہی وزیراعظم سردار تنویرالیاس نا اوڑدہی

اسلام آباد۔ 25جون (اے پی پی) صدر مملکت آصف علی زرداری تون آزاد جموں وکشمیر نا مسکوہی وزیراعظم سردار تنویر الیاس ، سلاہکار جیل خانہ جات حکومت آزاد کشمیر سردار احمد صغیر، ایم ایل اے علی شاہ سونی و سردار عمرتنویر آ تالان ڈل کراچی ٹی اوڑدہی کرے۔ چارشنبے نادے آ ایوان صدر نا پریس ونگ آن جاری بیان نار داٹ اوڑدہی ٹی ڈل پاکستان پیپلزپارٹی ٹی شمولیت نا پڑو کرے۔ صدر مملکت ڈل انا خیرمقدم ءِ کرے و اوفتے پارٹی ٹی اوار مننگ آمبارکبادی تس۔ داوخت آ صدر آصف علی زرداری نا ایڑھ، پیپلزپارٹی زالبول ونگ اناصدر وایم پی اے فریال تالپور، گورنر پنجاب سردار سلیم حیدر، پیپلزپارٹی نا سینئر راہشون سلیم مانڈوی والا ، مسکوہی صدر آزاد کشمیر سردار محمد یعقوب خان، فیصل ممتاز راٹھور، چوہدری محمد ریاض و سردار ضیاء القمر ، وزیرداخلہ سندھ ضیاء الحسن لنجار، صوبائی وزیر حاجی علی حسن  و ایم پی اے سہیل انور سیال ئسک ہم ساڑی ئسر۔ بشخ ہلوک آک ملکی سیاسی و زرگزرانی حالیت آتیا سرجمی اٹ گپ وتران کریر و قومی مفاہمت، سیوت و السی ویل آتا ایسری کن گچین حکمت عملی اس تینا کننگ نا گرج آ زور شاغار۔