اسلام آباد۔ 25 جون (اے پی پی) وزیراعظم محمد شہباز شریف پارینے کہ کشت وکشار ملکی زرگزران نا تمبہ نا حیثیت تخک و کشاری بشخ اٹی پائیدار اصلاحات آن ملکی زرگزران ءِ پین مون آدننگک، کشاری بشخ اٹی اصلاحات آن فی ایکڑ پیدوار اٹی خاطرخواہ ودکی مریک و پیدواری خڑچ اٹی کمتی بریک، کشت وکشار نا شونداری کن بروک آ بجٹ اٹی کھد و کشاری دوائی تیا خراج خلپننگ انگ ءِ۔ وزیراعظم آفس نا میڈیا ونگ آن جاری پریس ریلیز نا رداٹ چارشنبے نادے آ وزیراعظم محمد شہباز شریف ناکماشی ٹی کشاری بشخ انا شونداری نا بابت جاچ دیوان اس اڈ ہلک۔ داوخت آ وزیراعظم پارے کہ کشت وکشار ملکی زرگزران نا تمبہ نا حیثیت تخک، و کشاری بشخ اٹی پائیدار اصلاحات آن ملکی زرگزران ءِ پین مون آدننگک، کشاری بشخ اٹی اصلاحات آن فی ایکڑ پیدوار ٹی خاطرخواہ ودکی مریک و پیدواری خڑچ اٹی کمتی بریک۔ وزیراعظم پارے کہ فارم میکنائزیشن نا شون تننگ کن کشاری مشینری و ازباب آتیا خراج پدریسہ کم کننگے، کشاری اجناس نا سٹوریج نا لائخی ءِ ودفنگ نا بابت گام گیج آتے ترند کننگے۔ وزیراعظم پارے کہ صوبہ غاتا کشاری بشخ انا شونداری کن پوسکن آ ڈٹ و فنڈ آتا فراوانی ستاکڑزک، اومیت ءِ کشاری اسکالرشپ آ چین آ مون تروک آ بندغ آک پدی وطن آ بننگ آ کشاری بشخ انا مون آدننگ کن بطور انٹرپرینیور قابل قدر خذمت سرایترہ۔ وزیراعظم پارے کہ کشت وکشار نا بشخ اٹی شونداری آن غٹ آن زیات فائدہ بزغر و خلقی علاقہ غاتا ہنکینی تے مریک، کشت وکشار نا شونداری کن بروک آ بجٹ اٹی کھد و کشاری دوائی تیا خراج خلپننگ انگ ءِ۔ دیوان اٹی وزیراعظم ءِ کشاری بشخ اٹی اصلاحات خاص کر کشاری پیدوار اٹی ودکی، کشاری انفراسٹرکچر و بزغرآتا آسان کشاری وام تسکان رسینگ نا بابت سلاہ پیش کننگا۔ حوال اٹی پاننگاکہ نیشنل ایگریکلچر انوویشن اینڈ گروتھ ایکشن پلان بزغرآتا کٹیا ءِ ودفنگ، پیدوار اٹی ودکی وجوان اصلاحات آ مرکوز ءِ۔ حوال اٹی پاننگاکہ کشاری بشخ اٹی ویلیو ایڈیشن کرسا برآمد آتیان بزغرآتا کٹیا ءِ ودفنگک و نہادی زرمبادلہ کٹیا کننگ مریک، قومی ٹیکنالوجی فنڈ انا ڈٹ اگنائٹ نار داٹ 129 کشاری اسٹارٹ اپس بناکننگانے۔ دیوان اٹی بنجائی وزیر غذائی رکھ رانا تنویر حسین ، بنجائی وزیر چاگڑدی بدلی ڈاکٹر مصدق مسعود ملک، وزیراعظم نا چیف کوآرڈینیٹر مشرف زیدی، کشاری بشخ اکن وزیراعظم نا چیف کوآرڈینیٹر احمد عمیر، کشاری بش خاتون وابستہ نجی بشخ انا انٹرپرینیور و بڑزکو سرکاری کمامدارآک ساڑی ئسر۔
