2022ورناتاسال مریک، ورناتیکن سرسہب گرین یوتھ پروگرام و سرسہب ورنامرکزآتا بناءِ کننگ اُن، وزیراعظم نا خصوصی کمکار امور نوجوانان

اسلام آباد۔ 01 فروری (اے پی پی) وزیراعظم نا خصوصی کمکار امور نوجوانان عثمان ڈار پارینے کہ 2022ورناتا سال مریک، زوت پاکستان کامن ویلتھ یوتھ کانفرنس نا مہمانداری ءِ کیک، سرسہب ورنا انوویشن لیگ اٹ 500 ورناتے موقع ایتنہ، ورناتیکن سرسہب گرین یوتھ پروگرام و سرسہب ورنامرکز آتا بناءِ کننگ اُن۔ داخیال آتا درشانی ءِ او سے شنبے نادے آ نیوز کانفرنس آن تران کرسا کرے۔ اوپارے کہ 2022ورناتا سال مریک، بنجاصوبہ غاتون اواری اٹ ورناتا گچینی کن کاریم کیک، دا بابت صوبہ و بنجانا نیام اٹ ورناتا بابت سرجزآتیٹی کمکاری کن صوبائی حکومت آتے چٹھی نوشتہ کرینن، بنجائی حکومت صوبائی حکومت آتے دا بابت ہرممکن کمک فراوان کیک۔ اوپارے کہ پاکستان نا 68 درسد آبادی ورناتیا تالان ءِ ، ورناتے مثبت سرجزآتا پبی وارخواہی فراوان کینہ۔ عثمان ڈار پارے کہ پاکستان کامن ویلتھ یوتھ کانفرنس نا مہمانداری ءِ کیک، دا کانفرنس اٹ 54 ملک بشخ ہلیرہ، داکانفرنس ورناتا جہانی دے انا وخت آ اڈ اتننگک۔ اوپارے کہ دنیا ہُرک کہ پاکستان نا ورناک کس اسے آن کم افس ، وزیراعظم عمران خان نا وژن ورناتا راجی آسراتی ءِ۔ اوپارے کہ ورناتیٹی سرسہب ورناپروگرام نا رداٹ 100 ارب روپئی بشخنگ انگ ءِ ، 5 ہزار پوسکن آ کاروبار بناکرینے ، اسہ لکھ اسکالر شپ فراوان کرینے، ورناتے پین 60 ہزار اسکالرشپ تننگ والااُن ہراٹی داخلہ نا آخیریکو تاریخ 7 فروری ءِ، ورناک داڑآن فائدہ ہرفر۔ عثمان ڈار پارے کہ ورناتے اولیکو وار ہائی ٹیکنالوجی نا فنی تربیت نا فراوانی کن اسکالرشپ تننگ انگ ءِ، فنی تربیت دوئی کروک آ ورناک ملک اکن زرمبادلہ کٹیا کننگ ءُ۔ اوپارے کہ لکھ آ بندغ آتے روزگار نا فراوانی کن کوشست کننگ انگ ءِ، وزیراعظم عمران خان نا کوشست آتیان زرگزرانی گچینی نا کنڈآ ہِننگ ءِ۔ اوپارے کہ پاکستان اٹ ہر کہول آ ٹیلنٹ نا ہچ ءُ کمتی اس اف، سرسہب ورنا ٹیلنٹ ہنٹ پروگرام ورناتا سرپرستی ءِ کیک، داپروگرام نا رداٹ چندی 12 گوازی تیٹی ورناتا لائخی تے پٹنگ انگ ءِ ، فٹ بال نا میدان اٹ جوہر نشان تروک 20 ورناتا پڑونا بابت بروک آ ہفتہ کراچی ٹی دوداس مریک، اوکان پد دا ورناک تربیت کن پیشن نا ملک آ گدریفنگرہ۔ اوپارے کہ نجی بشخ انا کمک اٹ ورناتیکن جاب فیئر نا بست وبند کینہ ہراڑآن ورناتے ملازمت آتا دوئی کننگ نا موقع ملک۔ اوپارے کہ سرسہب ورنا انوویشن لیگ اٹ 500 ورناتے موقع ایتنہ، ورناتیکن سرسہب گرین یوتھ پروگرام و سرسہب ورنا مرکز آتا بناءِ کننگ اُن، داڑآن ورناتے اوفتا راجی آسراتی نا بابت آگاہی فراوان کننگک۔