اسلام آباد۔ 31 جنوری (اے پی پی) وزیرخارجہ مخدوم شاہ محمود قریشی پارینے کہ حکومت اقتصادی سفارتکاری ، علاقائی رابطہ غاتا مون آ دننگ و ڈیہہ ٹی امن کون آ اہم اولیت آتیا عمل کننگ ءِ۔ دا ہیت ءِ او دوشنبے نادے آ داڑے انسٹی ٹیوٹ آف ریجنل سٹڈیز نا بورڈ آف گورنرز نا دیوان نا کماشی ءِ کرسا پارے۔ وزیرخارجہ بورڈ آف گورنرز نا چیئرمین ہم ارے۔ سیکرٹری خارجہ سہیل محمود، مسکوہی سیکرٹری خارجہ جلیل عباس جیلانی، ایڈیشنل سیکرٹری پبلک پالیسی، ڈاکٹر اسرار حسین ، ماہرین جہانی امور، ڈاکٹر رفعت حسین و ڈاکٹر صائمہ ملک تون اوار ایلو بورڈ باسک آک دیوان اٹی بشخ ہلکر۔ انسٹیٹیوٹ آف ریجنل سٹڈیز نا صدر ایمبیسڈر ندیم ریاض انسٹیٹیوٹ نا تاریخی پس منظر و کارکڑد نا بابت سرجم حوال تس۔ وزیرخارجہ انسٹیٹیوٹ آف ریجنل سٹڈیز نا کارکڑد نا ستاءِ کرسا اودے پین گچین کننگ نا گرج آ زور شاغا و بورڈ اٹ اوار مروک آ پوسکن آ باسک آتے مبارکبادی تس۔ اوپارے کہ ترندی اٹ بدل مروک آ علاقائی و جہانی منظرنامہ ٹی تھنک ٹینکس نا کڑد بھاز اہمیت تخک۔ خارجہ پالیسی ءِ پوسکن آ وڑوڈول آتیا استوار کننگ کن وزارت خارجہ و ننا تھنک ٹینکس نا نیام اٹ خڑکی رابطہ المی ءِ۔ شاہ محمود قریشی پارے کہ ننتون جہانی تعلقداری و علاقائی امور نا بابت ، گچین اسکالرز و پولکار ارے۔ انسٹیٹیوٹ آف اسٹریٹجک سٹڈیز اسلام آباد و انسٹیٹیوٹ آف ریجنل سٹڈیز نا کمک اٹ جہانی آب انا پٹ وپول ءِ مون آ اتنگ خواہک۔ حکومت پاکستان، وزیراعظم عمران خان نا کماشی و وژن ءِ مون آ تخسا، اقتصادی سفارت کاری، علاقائی رابطہ غاتا مون آ دننگ و ڈیہہ ٹی امن کون آ اہم اولیت آتیا عمل کننگ ءِ۔ وزیرخارجہ بورڈ باسک آتا کنڈآن مون آ بروک آ سلاہ تا ستا ءِ کرسا ، شرفمند آ بورڈ انا باسک آتا منت واری ءِ ہرفے۔
