صوبہ بلوچستان نا الس نا شونداری و شونہالی ساڑی حکومت نا اولیت آتا اہم ءُ جزو اسے، بلوچستان نا الس نا احساس محرومی تا ازالہ وزیراعظم عمران خان نا ویژن ءِ، چیئرمین سینیٹ

اسلام آباد۔ 31 جنوری (اے پی پی) چیئرمین سینیٹ محمد صادق سنجرانی پارینے کہ صوبہ بلوچستان نا الس نا شونداری و شونہالی ساڑی حکومت نا اولیت آتا اہم ءُ جزو اسے، بلوچستان نا الس نا احساس محرومی تا ازالہ وزیراعظم عمران خان نا ویژن ءِ، گوادر پورٹ صوبہ بلوچستان نا شونداری و شونہالی نا مرکز جوڑ مریک۔ سینیٹ سیکرٹریٹ نا رداٹ داخیال آتا درشانی ءِ او بلوچستان اسمبلی نا اسپیکر میر جان محمد خان جمالی تون گپ وتران کرسا کرے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی سینیٹر ثناجمالی، منظور احمد کاکڑ، کامران مرتضیٰ و نصیب اللہ بازئی ئسک ہم ساڑی ئسر۔ داوخت آ بلوچستان نا سیاسی و جم زرگزرانی حالیت و ایلو امور آ گپ وتران کننگا۔ اوڑدہی ٹی چیئرمین سینیٹ پارے کہ صوبہ بلوچستان نا الس نا شونداری و شونہالی ساڑی حکومت نا اولیت آتا اہم ءُ جزو اسے۔ بلوچستان نا الس نا احساس محرومی تا ازالہ وزیراعظم عمران خان نا ویژن ءِ۔ اوپارے کہ بڑزکو ایوان اٹ صوبہ بلوچستان آن تعلق تخوک آ سینیٹر آتے بلوچستان نا الس نا پبی وڑاٹ نمائندگی نا موقع تننگک۔ صوبہ بلوچستان نا شونداری و شونہالی مچ آ ملک انا زرگزرانی سوگوی ءِ پک کیک۔ محمد صادق سنجرانی پارے کہ سی پیک ڈٹ ملک انا شونداری و شونہالی کن گیم چینجر ناحیثیت تخک۔ گوادر پورٹ صوبہ بلوچستان نا شونداری و شونہالی نا وت جوڑ مریک۔ صوبہ بلوچستان اٹی سی پیک نا رداٹ برجاڈٹ آتا زوت پوروی آن صوبہ نا الس نا زند انا آب گچین مریک۔ اوپارے کہ السی نمائندہ غاک تینا لائخی تے کاریم اٹ اتسا الس نا زند اٹ مثبت بدلی اتنگ کیرہ۔ اسپیکر بلوچستان اسمبلی بلوچستان اسمبلی نا شونداری و الس نا شونہالی کن چیئرمین سینیٹ نا کوشست آتا ستاءِ کرے۔ اوپارے کہ صوبہ بلوچستان اٹی سی پیک نا رداٹ برجاڈٹ آتا زوت پوروی صوبہ نا شونداری و شونہالی نا ضامن ءِ۔ بنجائی حکومت نا صوبہ بلوچستان اٹی برجاشونداری ڈٹ آتیٹی زیات است خواہی ستاکڑزک۔