کوئٹہ۔ 31 جنوری (اے پی پی) ’’احساس کس اس لنگڑ خاچپ‘‘ پروگرام نا رداٹ ہڑدے ئی 350 مخلوق ءِ کن و خور فراوان کننگک۔ داخیال آتا درشانی ءِ ڈپٹی اسپیکر قومی اسمبلی قاسم خان سوری ’’احساس کس اس لنگڑ خاچپ‘‘ پروگرام نا بناءِ کننگ نا وخت آمہمان خاص نا حیثیت اٹ اینو کوئٹہ نا نواحی علاقہ نواں کلی ٹی میڈیا تون گپ وتران کرسا کرے۔ اوپارے کہ احساس پروگرام ساڑی حکومت نا کنڈآن ملک انا نیزگار مخلوق کن اسہ احساس نا روشنائی اسے ہراڑآن ننا راج انا غٹ حقدار مخلوق فائدہ ہرفک۔ داپروگرام بیرہ مخلوق ءِ کن و خور اکن آخا بلکن دانا رداٹ نیزگار ورناتے وام، نیزگار و حقدار مخلوق ءِ درمان نا آسراتی و چوری و مسکین تا بحالی و بے اُرا مخلوق کن آسان قسط آتیا اُرانا فراوانی اس ہم ارے۔ اوپارے کہ ’’احساس کس اس لنگڑ خاچپ‘‘ پروگرام وزیراعظم عمران خان نا خصوصی پارت آتیا نیزگاری نا لکیر آن شیف رہینگوک آ علاقہ غاتیٹی بناکننگانے، سیلانی ویلفیئر ٹرسٹ کون آ تنظیمک داپروگرام ءِ مون آ دننگ اٹ تینا مثبت کڑد ءِ ادا کننگ ءُ۔ اوپارے کہ کوئٹہ نا خلقی آ علاقہ غاتیٹی ہراڑے نیزگار مزور آک رہینگرہ و مسافر آتا ہن و بر زیات ءِ ہمو علاقہ غاتیٹی سیلانی ویلفیئر ٹرسٹ انا توسط اٹ 350 غریب ومسکین آتیٹی ہڑدے نا بنداو آ کن و خور بشخنگک۔ داوخت آ سیلانی ویلفیئر انٹرنیشنل ٹرسٹ نا نمائندہ و محکمہ زکواۃ نا آفیسر آک ہم ساڑی ئسر۔
