اسلام آباد۔ 31 جنوری (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ حکومت کانودی اصلاحات پارلیمنٹ اٹ اتنگ ءِ ، دا پاننگ سہی اف کہ احتساب نا عمل بے سہب مسنے، ملکی تاریخ اٹ اولیکو وار بھلا بھلا بندغ آتا احتساب ءِ کننگا، اگہ احتساب نا عمل بے سہب مسکہ تو ملک انا مسکوہی وزیراعظم نریتوکہ، عدالتی اصلاحات وخت انا اہم ءُ خواست اسے، آجو عدلیہ نا آجوئی ٹی حکومت ہروڑنا نیام تمنگ ءِ سگپک، ملکی زرگزران نا گچینی کن دنیا نا بھلا بھلا ادارہ غاک گواہی تننگ ءُ، جان جوڑی انصاف کارڈ انا آسراتی آن ملک انا ہر شاری بے پرخ 10 لکھ روپئی اسکان درمان نا آسراتی آن فائدہ ہرفنگ کیک، داآسراتی یورپ و امریکہ نا ہم 100 درسد آبادی ءِ داوخت اسکان دوئی اف، ہنداحقی بدلی ءِ ہرا وزیراعظم عمران خان نا کماشی ٹی پاکستان تحریک انصاف نا حکومت ایسونے، ہندا کارکڑد نا بنداو آ بروک آ گچین کاری تیٹی کانہ و عمران خان اسہ وار ولدا وزیراعظم گچین مریک۔ دوشنبے نادے آ داڑے میڈیا نا نمائندہ غاتون گپ وتران کرسا اوپارے کہ بدبختی نا ہیت دادے کہ مخلوق ءِ انصاف نا ذریعہ دوئی اف۔ دارداٹ ساڑی حکومت چار بھلو کاریم کرینے۔ وزیراعظم ویب پورٹل نا کمک اٹ نیزگار و جنوزان تا دادرسی تون اوار اوورسیز پاکستانی تا ڈغارتیا کوزہ ءِ ہلفنگا۔ بابراعوان پارے کہ حکومت لااینڈ ریفارمزپیکج اس اتنگ ءِ۔ داملکی تاریخ نا اسہ بھازبھلو پیکج اس مریک۔ ای ہم دابابت تینا سلاہ تے تسونٹ۔ کابینہ دانا منظوری ءِ تسنے۔ دا اصلاحات آرڈیننس نا کمک اٹ آخا بلکن پارلیمنٹ اٹ پیش کننگک و پارلیمانی کمیٹی تیٹی غٹ جماعت آتا نمائندہ غاتا ساڑی گری ٹی اوڑآ شرہ مریک۔ اگہ کس اس خواہک کہ او سلاہ ایتے تو حکومت اونا خیرمقدم ءِ کیک۔ اوپاکستان اٹ عدالتی اصلاحات نا سخت گرج ءِ۔ داکان مست اسہ بھلو سے ٹی ہم دوشاغنگتنے۔ ملک انا تاریخ اٹ اولیکو وار پاکستان نا بھلا بھلا ایوان تیٹی تولوک آتا ماڑی تیٹی زمی جمب بس۔ داپاننگ سہی اف کہ احتساب بے سہب مس۔ اوپارے کہ اگہ احتساب بے سہب مسکہ تو مسکوہی وزیراعظم ملک آن نریتوکہ۔ اوپارے کہ ہراکاریم تدوک آ 71 سال اٹی مننگ کتوعمران خان نا حکومت ءِ داپاننگپ کہ اودافتے کپ، اولیکو وار بھلا بھلا مخلوق کانود نا زد اٹ بس، بریبری نا بنداو آ احتساب کننگا، مخلوق ءِ اولیکو وار پاننگاکہ و مقدمہ غاتون مون ایتر، داوخت آ ملک اٹی جان جوڑی انصاف نا کارڈ انا کمک اٹ مچ آملک اٹی مچ آ تپہ غاتے درمان نا آسراتی ءِ۔ دا10 لکھ اسکان نا آسراتی ءِ۔ داوڑنا آسراتی یورپ و امریکہ ٹی ہم 100 درسد آبادی ءِ دوئی اف۔ دااصل بدلی ءِ۔ سرکاری ملازم آتیکن قاعدہ ٹی ترمیم آتا کمک اٹ اصلاحات اتنگانے ہرا ملازم جوان کاریم کیک اودے انعام ملک و ہرامس کنڈکٹ اٹ اوار مریک اوڑتون کانودی کارروائی کننگک۔
