اسلام آباد۔ 28 جنوری (اے پی پی) چیئرمین سینیٹ محمد صادق سنجرانی کیچ بلوچستان اٹی سیکورٹی فورس آتا چیک پوسٹ آ دہشت گرد جلہو نا ترندی اٹ مذمت ءِ کرینے۔ سینیٹ سیکرٹریٹ نا کنڈآن جاری بیان نا رداٹ چیئرمین سینیٹ دہشت گرد آتا جلہو اٹی شہید مروک آ سیکورٹی فورس آتا کارندہ غاتا درجہ غاتا بڑزی و خاہوت کن صبر و جمیل نا دعا کرے۔ اوپارے کہ وطن عزیز کن جون تے قربان کروک آ شہید آتے خراج عقیدت پیش کینہ۔ اوپارے کہ شرپسند زموار آک پاکستان نا شونداری و سوگوی نا مخالف ءُ، وطن نا دفاع و امن و ایمنی کن دھرتی نا نرزور گل زادہ غاتا قربانی تے مدام یات تخنگک۔ اوپارے کہ ملک دشمن زموار آک تینا مسخت آتیٹی اسُل سرسہف مفسہ، دہشت گردی نا چٹفنگ کن جہد ءِ برجاتخنہ۔ ڈپٹی چیئرمین سینیٹ مرزامحمد آفریدی ، سینیٹ اٹی قائد ایوان سینیٹر شہزادہ وسیم و قائد حزب اختلاف سید یوسف رضاگیلانی ئسک ہم سیکورٹی فورس آتیا دہشت گرد جلہو نا مذمت و شہید مروک آ سیکورٹی فورس آتا کارندہ غاتا درجہ غاتا بڑزی کن دعا کرینو۔
