اسلام آباد۔ 28 جنوری (اے پی پی) پاکستان تحریک انصاف نا سیکرٹری جنرل و بنجائی وزیر ڈٹ بندی، شونداری ، اصلاحات و خصوصی گام گیج اسدعمر بلوچستان نا ضلع کیچ اٹی فوجی چوکی آ دہشت گرد آتا جلہو نا ترندی اٹ مذمت ءِ کرینے۔ پی ٹی آئی نا مرکزی میڈیا ڈیپارٹمنٹ آن جاری بیان نا رداٹ اسدعمر جلہو اٹی نرزور ورناتا شہیدی تیا است ڈکھیائی نا درشانی ءِ کرسا پارے کہ قوم شہیدی نا جام ءِ کنوک آ تینا دا نرزور گل زادہ غاتے سلام پیش کیک۔ ننا ورناک قوم انا تائید و اللہ نا نصرت اٹ ملک اٹی امن نا شمع ءِ روشنا کرینو۔ اوپارے کہ لغور، سفاک و کینہ پرور دشمن تینا شرانگیزی تیان امن نا چراغ ءِ کسفنگ خواہک۔ شکست کنوک و رسوا دشمن ہروارآنبار آخبت ہم ذلت نا گواچی مریک۔ اوپارے کہ ملک ءِ دہشت گردی نا غٹ وڑتیان پاک کننگ نا عزم کرینن۔ شہید آتا خاہوت آتون ہمدردی و ہڑزخواہی نا درشانی ءِ کینہ۔
