اسلام آباد۔ 28 جنوری (اے پی پی) وزیر مملکت پارلیمانی امور علی محمد خان پارینے کہ پی آئی اے ءِ نسخان نا سوب آن ملک انا چندی علاقہ غاتیٹی بالی پٹ آتیان جہاز آتے بند کننگانے، سوات بالی پٹ آن جہاز آک دُوارہ بحال مسنو، موہنجوداڑو بالی پٹ ہم زوت آپریشنل مریک۔ جمعہ نادے آ بڑزکو ایوان نا دیوان اٹی وقفہ سوج آتیٹی سینیٹر سید اللہ ابڑو، ہمایوں مہمند، سینیٹر اعظم نذیر تارڑ، روبینہ خالد و ایلوفتا سوج آتا ورندی ٹی اوپارے کہ موہنجوداڑو بالی پٹ 2018ء آن بند ءِ، داوخت آ ہموڑے کمرشل فلائٹس دوئی اف، بیرہ اے ٹی آرز جہاز آک چلینگ انگ ءُ، ہراتم دا بالی پٹ آپریشنل مریک تو جہاز آک بحال مریرہ، اومیت ءِ کہ زوت دا بالی پٹ آپریشنل مریک۔ اوپارے کہ بنجائی حکومت صوبائیت یا علاقائی عصبیت نا بنداو آ صوبہ سے ٹی جہاز آتے بند کننگ آ باور کپک۔ اونا سوج ہی ودی مفک، بلوچستان ، خیبرپختونخوا و پنجاب نا گڑاس بالی پٹ ہم بند کننگا، اگہ کمرشل بنداو آ او فائدہ ئی مفس تو ولدا جہاز آتے چلیفنگ مشکل مریک۔ اوپارے کہ لاہور و اسلام آباد نا نیام اٹ جہاز آتا بحالی کن بنجائی وزیر ہوابازی تون ہیت کیوہ۔
