اسلام آباد۔ 27 جنوری (اے پی پی) وزیراعظم عمران خان پارینے کہ واکدار آتے کانود نا تابع کننگ جہاد ءِ، انصاف نا نظام اٹ اصلاحات نا مسخت لس بندغ ءِ انصاف فراوان کننگ و واکدار ءِ کانود نا تابع کننگ ءِ، فوجداری نظام اصلاحات کانود نا حکمرانی نا کنڈآ اسہ بھلو گام اسے، حکومت تینا کاریم ءِ کرینے داسہ عدلیہ و وکیل آک فوجداری کانودی و نظام انصاف اٹی اصلاحات آ عملدرآمد کرفر، ملکی تاریخ اٹ اولیکو وار درمان نا مفت آسراتی تا فراوانی کن ہیلتھ کارڈ تننگ انگ ءِ، الیکشن اٹ ای وی ایم ٹیکنالوجی ءِ اتنگ اُن، ریکوڈک کیس آن پاکستان ءِ بھاز نسخان مسنے، اوورسیز پاکستانیک ملک اٹی کانود نا حکمرانی مفننگ نا سوب آن زرکاری کپسہ، اوملک اٹی زرکاری نا بناءِ کریر تو کس اسے نا مون آ دوتے توروئی تمپک، اسلام میرات اٹی زالبول آتا حق ءِ جتا کرینے ، داسہ دا مننگ کپک کہ اوفتے جائیداد اٹی بشخ ملپ۔ داخیال آتا درشانی ءِ او پنچ شنبے نادے آ داڑے فوجداری کانود ونظام انصاف اٹ اصلاحات نا دود آن تران کرسا کرے۔ وزیراعظم پارے کہ کانود نا حکمرانی آن بیدس ہچ ءُ ملک و راج اس شون ہلنگ کپک۔ اینو اسکان اسہ راج اس ہم انصاف نا نظام و کانود نا حکمرانی آن بیدس شون ہلتنے۔ ننا ملک اٹی انصاف نا نظام کرار کرار آ ہندن جوڑ مرسا کرے کہ واکدار اوڑآن فائدہ ہرفسا کرے و اوے کس اس ہلنگ کتوکہ وخت اس کہ لس بندغ آن زندان آک پُر ءُ۔ انصاف نا نظام سہی مفننگ نا سوب آن کانود نا حکمرانی ءِ نسخان رسینگانے۔ تعلیم نا نظام ہم خراب مس۔ وخت اس سرکاری اسکول آتا نظام بھاز جوان ئسکہ و پنی آ دانشور آک اوکان تعلیم دوئی کرسا پیش تمارہ ولدا داڑتون اوار اوار پرائیویٹ و انگلش میڈیم اسکول نا نظام ہم بس و ہموڑے اسہ اشرافیہ اس تیار مننگ لگا ہرادے ایلوفتا نسب جوان ءُ ملازمت ملاکہ۔ ننا ہسپتال آتا ہم ہندا حالیت ئسک و کرار کرار آ ننا سرکاری ہسپتال آک پدی سلیسر۔ ہزگار تپہ نا درمان کن نجی ہسپتال آک ئسر وخت اس کہ بھاز زیات ہزگار مخلوق درمان کرفنگ کن پیشن نا ملک ہناکہ۔ وزیراعظم پارے کہ فوجداری کانود اٹ اصلاحات اولیکو وار ملکی تاریخ اٹ کننگ انگ ءِ۔ ضابطہ دیوانی ٹی مہالو نن دا کاریم ءِ کرینن و انصاف نا نظام اٹ اصلاحات نا مسخت لس بندغ ءِ انصاف فراوان کننگ و واکدار آتے کانود نا تابع ٹی اتنگ ءِ۔ وزیراعظم پارے کہ مدینہ نا ریاست ہمو اولیکو ریاست ئس ہرادنیا نا تاریخ اٹ اسہ عظیم ءُ انقلاب اس برپاکرے و قرارداد مسخت آتا ماڈل ہم مدینہ نا ریاست ہی ئسک ہرانا اِرا بنداوی اصول ئسر، اسہ آسودہی ریاست نا ٹہیفنگ و ارٹ میکو کانود نا حکمرانی۔ ملک اٹی اولیکو وار یونیورسل ہیلتھ کوریج تننگ انگ ءِ و لس بندغ ءِ درمان کن ہیلتھ کارڈ تننگ انگ ءِ۔ دنیا نا شون ہلوک ملک آتیٹی ہم داوڑنا نظام ساڑی افک و دا آسودہی ریاست نا جوڑ کننگ نا کنڈآ اسہ بھاز بھلو گام اسے وخت اس کہ فوجداری کانود و نظام انصاف اٹ اصلاحات کانود نا حکمرانی نا کنڈآ اسہ اہم ءُ گام اسے۔ ہجرت مدینہ غان پد مسلمانک اولیکو پنچ سال بھاز مشکل آتون مون تسر ولے دا پنچ سال اٹی کانود نا بالادستی ءِ جوڑ کننگا۔ اوپارے کہ پاکستان اٹ عدالتی نظام کرارکرار آ نزور مرسا کرے۔ واکدار و نزور کن جتا جتا ءُ کانود ئسک۔ اوپارے کہ لیگل سسٹم سہی مفننگ آن کانود نا حکمرانی ممکن اف۔ پاکستان نا تاریخ اٹ اولیکو وار کانود نا حکمرانی قائم کننگ نا کوشست کننگانے و اصلاحات نا مسخت لس بندغ ءِ انصاف نا فراوانی ءِ پک کننگ ءِ۔ دانا غٹ آن زیات فائدہ لس بندغ ءِ مریک۔ راج اٹ انصاف آن شونداری مریک انتئے کہ واکدار ءِ دُزی نا سزا ملپک و نزور اختہ مریک۔ 90 لکھ اوورسیز پاکستانی ننا میرات ءُ و اوفتا کٹیا 22 کروڑ پاکستانی تیان زیات ءِ۔ اوفتا زررادہ کننگ آن ملک انا نظام چلینگ انگ ءِ ولے او پاکستان اٹ داخاطرآن زرکاری کپسہ انتئے کہ او تکرہ کہ داڑے کانودنا حکمرانی اف و اوفتے انصاف نا نظام آ پت اف۔ ہراوخت آ اوورسیز پاکستانیک زرکاری نا بناءِ کریر ، ننے کس اسے نا مون آ دوتے توروئی تمپک۔ نن داسہ وخت اس وام اکن آئی ایم ایف تون رجو ع کینہ و وخت اس سنگت آتیا ہنوئی تمک۔ وزیراعظم پارے کہ ریکوڈک نا کیس آن پاکستان ءِ بھاز نسخان مس۔ اگہ کانڑآک چلینگارہ تو ننے بھاز زیات کٹیا مننگ کریکہ۔ 6 ارب ڈالر نا ننے جرمانہ مسنے و جہانی ثالثی عدالت اٹ باندات ءِ ہرفنگا اگہ ننا انصاف نا نظام گچین مسکہ تو ہموڑے اونا سماعت مننگ کریکہ۔ اوپارے کہ نن تینا کاریم ءِ کرینن۔ داسہ عدلیہ و وکیل آک فوجداری کانود ونظام انصاف اٹ اصلاحات آ عملدرآمد کرفر۔ دود آن تران کرسا پارلیمانی سیکرٹری وزارت کانود و انصاف ملیکہ بخاری پارے کہ نن اسلامی آسودہی ریاست نا جوڑ کننگ نا کنڈآ ہِننگ اُن۔ کانود نا بالادستی نا عمل ءِ مون آ درینن۔ اوپارے کہ زالبول آتا وتواجہی ننا اولیت ءِ۔ انصاف نا التواآن مظلوم نا حق زہمی مریک۔ مسڑ و زالبول آتا رکھ حکومت نا زمواری ءِ۔
