اسلام آباد۔ 27 جنوری (اے پی پی) وزیرخارجہ مخدوم شاہ محمود قریشی پنچ شنبے نادے آ متحدہ قومی موومنٹ نا پارلیمانی راہشون و قومی اسمبلی نا باسک خالد مقبول صدیقی، بنجائی وزیر انفارمیشن ٹیکنالوجی امین الحق، قومی اسمبلی نا باسک کشور زہرہ تون ٹیل فون آ رابطہ کرے و کراچی ٹی پرامن مچی کروک آتیا پولیس نا ناروا بیدادی نا ترندی اٹ مذمت ءِ کرے۔ وزیرخارجہ پارے کہ پرامن برانز ءِ لاٹھی و شیلنگ نا کمک اٹ منتشر کننگ جمہوری حق آن چپ ءِ۔ وزیرخارجہ ایم کیو ایم نا کارندہ اسلم نا شہیدی آ ہڑزخواہی کرے و پارےکہ پولیس بیدادی اٹ ایم کیو ایم نا کارندہ نا خن نا زیان بھاز است ہسونی و مذمت نا قابل ءِ، مخدوم شاہ محمود قریشی پارے کہ متحدہ قومی موومنٹ نا زالبول آتیا پولیس بیدادی نا اخہ در مذمت ءِ کننگے کم ءِ، ہراوڑ ایم کیو ایم نا گچین ایم پی اے ءِ کراچی نا سڑک آتیا گرکننگا اودے مچ آ قوم خنا۔ شاہ محمود قریشی پارے کہ درو نا است ہسون واقعہ غان جمہوریت نا دروغ انا دعویدار آتا قلعی پاش مس۔ شاہ محمود قریشی پارے کہ سندھ انا بلدیاتی کانود، ماسوائے پیپلزپارٹی ، غٹ جماعت مسترد کرینے، حتی کہ پی ڈی ایم اٹ اوار پاکستان مسلم لیگ نون ہم مسترد کرینے۔ داکانود نا برخلاف اسمبلی نا تہہ ٹی برانز و اسمبلی نا پیشن جماعت اسلامی نا دھرنا پدریسہ برجاءِ، مخدوم شاہ محمود قریشی پارے کہ سندھ انا بلدیاتی نظام، الس نا نیام اٹ مسخرہ اس جوڑ مسنے۔ وزیرخارجہ مخدوم شاہ محمود قریشی پی ٹی آئی نا وائس چیئرمین نا حیثیت اٹ، داکانودنا دمدستی بدلی آ زور شاغا۔
