لاہور۔ 27 جنوری (اے پی پی) لاہور نا احتساب عدالت شہباز شریف، حمزہ شہباز تون اوار خاہوت نا برخلاف منی لانڈرنگ ریفرنس نا سماعت ءِ 4 فروری اسکان پدبٹسا بروک آ سماعت آ نیب انا گواہ شاہد محمود نا بیان ءِ قلمبند کننگ نا پرمان کرے۔ پنچ شنبے نا دے آ احتساب عدالت نا جج نسیم احمد ورک منی لانڈرنگ ریفرنس آ سماعت کرے ۔ شہباز شریف کورونا دین اٹی اختہ مننگ نا سوب آن احاطہ عدالت اٹ تینا گاڈی ٹی ساڑی ئسک۔ اونا وکیل عدالتءِ معلومدار کرے کہ شہباز شریف پیشی کن حاضر ءِ و احاطہ عدالت اٹ ساڑی ءِ ولے کورونا دین آن زہمی مننگ نا سوب آن کمرہ عدالت اٹ پیش مننگ کپک وخت اس کہ حمزہ شہباز عدالت اٹ پیش مرسا تینا حاضری ءِ پورو کرفے، اونا وکیل ناجوڑی نا سوب آن پیش مننگ کتو۔ عدالت شہباز شریف و حمزہ شہباز نا حاضری ءِ منظور کرسا ہڑتوم آ دوبہ دار آتے ہِننگ نا موکل تس۔ عدالت مستی سماعت ءِ چار فروری اسکان پدبٹے و بروک آ سماعت آ نیب گواہ شاہد محمود ءِ بیان ریکارڈ کرفنگ نا پابند کرے۔
