اسلام آباد۔ 27 جنوری (اے پی پی) سارک چیمبر آف کامرس اینڈ انڈسٹری خبڑدار کرینے کہ اوغانستان دنیا نا بدترین انسانی تنکی نا دنگ آٹی ءِ و اونا نیمہ غان زیات آبادی ءِ خور انا کاختی مون تروک ءِ۔ اقوام متحدہ نا ادارہ غاتا حوالہ ءِ ترسا داہیت ءِ سارک چیمبر نا صدر افتخار علی ملک مسلم خان بنوری نا کماشی ٹی اوغان پوریاگر آتا ڈل اتون گپ وتران کرسا پارے ہرا پنچ شنبے نادے آ داڑے اوڑتون اوڑدہی کرے۔ اومستی پارے کہ دا تنکی جنگ زدہ یمن ءِ مون تروک غذائی کاختی آن ہم سنگین ءِ و کانگوآن پد غذائی بے رکھ انا دا ارٹ میکو ہلہلہ ئی و بدترین حالیت آک ءُ۔ اوپارے کہ داسہ وخت بسنے کہ دنیا، خاص وڑاٹ دیکی ملک بشمول امریکہ، اوغانستان اٹی خور انا فراوانی ءِ ترند کننگ و اونا رفتار ءِ ودفنگ کن گچین وڑاٹ کاریم کیر۔ اوغانستان تون واپار نا بابت ہیت کرسا اوپارے کہ وزیراعظم عمران خان اوغان پوریا گر برادری اتون ٹرانزٹ ٹریڈ ءِ مون آ دننگ کن مہالو آن خراج آتیٹی کمتی کرینے۔ اوغان الس نا دمدستی گرج آتے پورو کننگ کن خور، دوائی و کمکی گڑاتا چندی خصوصی کھیپ مہالو آن روانہ کننگانے۔ افتخار علی ملک پارے کہ فیڈریشن آف پاکستان چیمبر آف کامرس اینڈ انڈسٹری نا یونائیٹڈ بزنس پڑک اوغان پوریاگر آتون پدریسہ رابطہ ٹی ءِ و غٹ صوبہ غاتیٹی ہرممکن مدد و کمک فراوان کننگ ءِ۔ اوپارے کہ یوبی جی نا صدر زبیر طفیل، سیکرٹری جنرل ظفربختاوری، سیکرٹری حوالکاری مرزا اختیاربیگ تون اوار ایلو یوبی جی راہشون مومن علی ملک، غضنفر بلور و داروخان ءِ پارت کننگانے کہ او پشاور، اسلام آباد، لاہور، کراچی و کوئٹہ ٹی بروک آ غٹ اوغان درآمد کنندگان و برآمد کنندگان نا خیال ءِ تخر۔
