کوئٹہ۔ 27 جنوری (اے پی پی) بی این پی نا راہشون ناصر دہوار بلوچستان نیشنل پارٹی نا پوسکن گچین مروک آ صدر و قومی اسمبلی نا باسک سردار اخترجان مینگل و مچ آ کابینہ ءِ مبارکبادی ترسا پارینے کہ سرسہب کونسل سیشن آن پد بی این پی نا عہدیدار آتا گچینی جمہوری عمل نا چرجوئی اسے، بلوچستان نیشنل پارٹی نا پوسکن گچین مروک آ مرکزی عہدیدار آک و سینٹرل کمیٹی نا باسک آک پارٹی کارندہ غاتا اومیت آتیا پورو سلسا تینا زمواری تے جوان وڑاٹ پورو کرسا سائل و وسیلہ غاتا دفاع ءِ کیرہ۔ پنچ شنبے نادے آ تینا جاری کروک بیان اسے ٹی بلوچستان نیشنل پارٹی نا راہشون ناصر دہوار پارے کہ بی این پی اسہ جمہوری ءُ سیاسی پارٹی اسے ہراٹی کارندہ غاتا سلاہ و سوج آتے مون آ تخسا باقاعدہ جمہوری وڑاٹ کونسل سیشن نا وخت آ گچین کاری مریک ومرکزی و صوبائی کہول انا عہدیدار آتا گچین کاری ءِ کننگک و کوئٹہ ٹی سرسہب کونسل سیشن نا کریڈٹ بی این پی کوئٹہ نا سنگت آتے کاہک ہرافک دے و نن خواری کرسا بروک آ مہمان تا خاص خیال ءِ تخا و گچین وڑاٹ مرکزی کونسل سیشن نا بست و بند آتے پورو کرے۔ اوپارے کہ مسکوہی وزیراعلیٰ و قومی اسمبلی نا باسک سردار اخترجان مینگل مدام کارندہ غاتے شرف تسنے و مسہ دے ئی مرکزی کونسل سیشن نا سرسہب اڈتننگ و پوسکن گچین مروک آ عہدیدار آتیا داسہ بھلو زمواری اس مریک کہ او پارٹی ءِ اسہ وار ولدا بلوچستان نا پنی انگا جماعت جوڑ کننگ کن تینا توانائی تے خڑچ کیر۔
