کوئٹہ۔ 27جنوری(اے پی پی) پی ٹی آئی نا صوبائی راہشون حمزہ خان ناصر دشت انا علاقہ ٹی سیکورٹی فورس آتیا جلہو نا ترندی اٹ مذمت ءِ کرسا پارینے کہ سیکورٹی فورس آتیا جلہواٹی اوار زموار آک ہچ ءُ رعایت اسے نا حقدار افس۔ دہشت گرد آک تینا درملکی آقا تے خوش کننگ کن سیکورٹی فورس آتے شست کننگ ءُ۔ داڑے جاری مروک اسہ بیان اسے ٹی حمزہ خان ناصر پارے کہ دشت انا علاقہ ٹی سیکورٹی فورس آتا چیک پوسٹ آ دہشت گردآتا جلہو اٹی بے گناہ سیکورٹی کارندہ غاتا شہیدی و ٹھپی کننگ نا اخس کہ مذمت ءِ کننگے کم ءِ۔ اوپارے کہ پاکستان اٹی دہشت گردی نا برخلاف برجا جنگ اٹی ہزار آتا کچ اٹی پاک فوج، ایف سی، پولیس و ایلو کانود نافذ کروک آ ادارہ غاتا ورناک تینا جون تے ندر کرینو، اوپارے کہ دہشت گرد زموار آک سیکورٹی فورس آتیا جلہو کرسا سیکورٹی ادارہ غاتا حوصلہ ءِ شیف شاغنگ کپسہ، انشاءاللہ پاکستانی سیکورٹی فورس دہشت گرد آتے شکست ترسا دم کشک۔ اوپارے کہ سیکورٹی فورس آتیا جلہواٹی زموار آک ہچ ءُ رعایت اسے نا حقدار افس دا زموار آک تینا درملکی آقا تے خوش کننگ کن بے گناہ کارندہ غاتے شست کننگ ءُ۔ او دہشت گرد آتا جلہو اٹی شہید مروک آ کارندہ غاتا خاہوت تون ہڑزخواہی و ٹھپی تا زوت دراخ جوڑی کن دعا کرے۔ SMH
