اسلام آباد۔ 26 جنوری (اے پی پی) وزیراعظم عمران خان پارینے کہ پاکستان آسودہی ریاست اسے نا وڑاٹ دنیا کن درور اس مریک، بروک آ وخت قومی جان جوڑی کارڈ کون آ ننا گام گیج آتا فائدہ غاتے پک کیک، دنیا نا شون ہلوک ملک آتیٹی ہم شاری تے ہنداوڑنا ہیلتھ انشورنس دوئی اف، ملک انا پیسہ غاتے پلوک آ حکمرانک جکہ نا درمان ءِ کرفنگ کن ہم پیشن کارہ، اوفتا مچ آ خاہوت پیشن تولوک ءِ، پاکستان ءِ ہندن ءُ آسودہی ریاست اس جوڑ کینہ ہراٹی ریاست نزور و نیزگار نا زمواری ءِ ہلے و کانودنا حکمرانی مرے۔ داخیال آتا درشانی ءِ او چارشنبے نادے آ داڑے پوسکن آ پاکستان قومی جان جوڑی کارڈ انا جاری کننگ نا دود آن تران کرسا کرے ہرانا کمک اٹ اسلام آباد، پنجاب، آزاد جموں وکشمیر، گلگت بلتستان و تھرپارکر نا غٹ اُراوالاتے 10 لکھ روپئی اسکان نا جان جوڑی نا آسراتی مفت فراوان کننگک۔ داوخت آ وزیراعلیٰ پنجاب سردار عثمان بزدار، بنجائی وزیر حوالکاری و شینکاری چوہدری فواد حسین آن بیدس بنجائی وزیر آک و خصوصی کمکار آتون اوار بڑزکو کمامدارآک ہم ساڑی ئسر۔ وزیراعظم پارے کہ جان جوڑی کارڈ انا جاری کننگ آ عثمان بزدار و اونا ٹیم و بنجائی وزارت قومی جان جوڑی ءِ خراج تحسین پیش کیوہ۔ دابھاز بھلو گام اسے۔ جان جوڑی کارڈ انا کمک اٹ ہر خاہوت ءِ 10 لکھ روپئی اسکان نا مفت درمان نا آسراتی دُوبریک۔ وزیراعظم پارے کہ ای برطانیہ نا نیشنل ہیلتھ سسٹم ءِ خڑک آن خنانٹ وای اوڑآن بھاز زہمی ئسٹ ولے ہرا نظام ءِ نن ایسونن ، دااوکان ہم بڑزتر ءِ۔ برطانیہ ٹی شاری تیکن بیرہ سرکاری ہسپتال آتیٹی درمان مفت ءِ وخت اس کہ نن ہرا ہیلتھ کارڈ ءِ درستی راستی کرفینن اونا کمک اٹ شاریک نئے بیرہ سرکاری بلکن پرائیویٹ ہسپتال آن ہم مفت درمان نا آسراتی ءِ دوئی کننگ کیرہ و ہیلتھ انشورنس کن ہچ ءُ پریمیم اس تروئی تمپک۔ وزیراعظم پارے کہ دا کارڈ ہزگار و نیزگار نا پرخ آن بیدس غٹ اکن ءِ۔ اوپارے کہ ای سرکاری ہسپتال آتا تنزلی نا سفر ءِ خنانٹ ۔ مہالو سرکاری ہسپتال آک بھاز جوان ئسرہ ولے وخت اتون ہزگار آتیکن پرائیویٹ ہسپتال جوڑ مس وخت اس کہ سرکاری ہسپتال آک بیرہ نیزگارآتیکن سلیسر۔ وزیراعظم پارے کہ ڈسٹرکٹ ہسپتال آتا حالیت دا مس کہ اوفتے ٹی ڈاکٹر اف و پسماندہ علاقہ غاتیٹی جان جوڑی نا آسراتی مفننگ نا بریبر ءِ۔ میانوالی آن درمان کن مخلوق ءِ راولپنڈی آ بروئی تماکہ۔ مچ آ سسٹم بیرہ ایلیٹ کلاس ءِ آسراتی فراوان کریکہ و نیزگار بیرہ ٹھوکر کُننگ کن سلیسوسس۔ وزیراعظم پارے کہ پاکستان مسخت اسے کن جوڑ مسوسس، بھارت نا مسلمانک پاکستان کن وونٹ تسوسر وخت اس کہ اوفتے سماہم ئسک کہ او ہموڑے رہینگرہ۔ مستین اٹ کس اس داوژن نا بارواٹ سجفتو ہرانا رداٹ پاکستان جوڑ مسوسس۔ وزیراعظم پارے کہ ہراتم ای شوکت خانم ہسپتال نا جوڑ کننگ کن جہد نا بناءِ کریٹ تو پاکستان اٹ کینسر نا درمان متوکہ ہرانا سوب آن کنے تینا لمہ ءِ برطانیہ غا دروئی تما۔ لس بندغ کبین انگا درمان نا خڑچ ءِ سگنگ کتوکہ، ہنداخاطرآن ای کینسر ہسپتال اسے نا جوڑ کننگ کن سجفیٹ۔ ہراتم ای دا ہسپتال نا بناءِ کریٹ تو اولیکو چیف ایگزیکٹو ہرانا تعلق پیشن نا ملک آن ئس پارے کہ اگہ 5 درسد آن زیات ناجوڑ آتا مفت درمان کننگ نا کوشست کننگاتو 3 تُواٹی شوکت خانم ہسپتال بند مریک۔ مسہ تُو آن پد چیف ایگزیکٹو تو ہنا ولے او کینسر ہسپتال اینو ہم سالانہ 10 ارب روپئی نیزگارآتا مفت درمان آ خڑچ کیک۔ وزیراعظم پارے کہ مستین اٹ حکمران انتظار کریرہ کہ شونہالی بریک تو پاکستان ءِ آسودہی ریاست اس جوڑ کینہ، نن پاکستان ءِ ریاست مدینہ نا وڑآ آسودہی ریاست اس جوڑ کننگ نا بناءِ کرینن۔ دامسخت کن رحمت اللعالمین صلی اللہ علیہ و آلہ وسلم اتھارٹی اس جوڑ کرین ہرا تعلیمی ادارہ غاتیٹی خواجہ نبی کریم صلی اللہ علیہ و آلہ وسلم نا سیرت نا بابت تعلیم و آگاہی فراوان کیک۔ اوپارے کہ ریاست مدینہ نزور تپہ نا زمورای ءِ ہلک و کانود نا حکمرانی ءِ قائم کرے۔ پاکستان اٹ واکدار آتیکن جتا ءُ کانود اس ئسک و ہزگار و نیزگار اٹی پرخ ودسا ہنا۔ اینو نن جان جوڑی کارڈ انا ہراتاریخی گام ءِ ہرفینن۔ بروک آ وخت اونا فائدہ غاتے پک کیک۔ اوپارے کہ قومی سلامتی نا رکھ ہمووخت آ مننگ کیک ہراتم لس بندغ ریاست تون تعلق محسوس کے۔ مستین اٹ حکمرانک پیسہ غاتے پلسا پیشن ہنار، اوتینا درمان ءِ ہم پیشن نا ملک اٹ کرفرہ۔ اوفتے لس بندغ نا مشکل آتا احساس اف۔ نن ہرا آسودہی گام گیج آتے کرین اوفتا مستین اٹ درور ملپک۔ وزیراعلیٰ پنجاب سردار عثمان بزدار دود آن تران کرسا پارے کہ جان جوڑی کارڈ السءِ جان جوڑی نا آسراتی فراوان کننگ کن وزیراعظم نا تغ ءِ، اینو راولپنڈی ڈویژن نا ضلع غاتا الس ءِ ہم جان جوڑی کارڈ جاری کننگ انگ ءِ۔ 56 ہسپتال جان جوڑی کارڈ انا پینل آمریرہ۔ پنجاب حکومت 31 ضلع غاتا 11 کروڑ الس نا جان جوڑی کن 400 ارب روپئی جتا کرینے۔ مارچ انا ایسر اسکان مچ آ پنجاب اٹی جان جوڑی کارڈ انا آسراتی دوئی مریک۔ پنجاب حکومت جان جوڑی نا بشخ آ خاص چکار کرینے و دا صوبہ دالحاظ اٹ اسہ درور اس جوڑ مریک۔ اوپارے کہ پنجاب اٹی جان جوڑی نا بشخ اکن 200 ہنداخہ زیات بجٹ جتا کننگانے و 23 پوسکن ءُ ہسپتال و 8 زچہ بچہ ہسپتال تفنگ انگ ءِ۔ وزیراعظم نا خصوصی کمکار قومی جان جوڑی ڈاکٹر فیصل سلطان دود آن تران کرسا پارے کہ جان جوڑی نا بشخ اٹی انقلاب اس بننگ ءِ۔ بروک آ وخت اٹی دانا اثرآک مون آ بریرہ۔ داآسودہی ریاست نا کنڈآن عملی ءُ گام اسے۔ اوپارے کہ کوویڈ۔ 19 نا دین اٹی جہانی برادری پاکستان نا گام گیج آتا ستاءِ کرے۔ نن جان جوڑی نا بشخ آ چکار کرینن۔
