راولپنڈی۔ 26 جنوری (اے پی پی) بنجائی وزیر داخلہ شیخ رشید احمد پارینے کہ اپوزیشن اول استیفہ غاتیا بے پتی آن نرا، اپوزیشن پین یک و نیم سال ہم ذلیل و خوار مریک، اپوزیشن ءِ فنانس بل آ ہم شکست اتون مون تروئی تما، مولانا فضل الرحمان غیر زمواری ءُ بیان بازی کننگ ءِ، اپوزیشن تون ہچ ءُ ایجنڈا اس اف۔ داخیال آتا درشانی ءِ بنجائی وزیر چارشنبے نادے آ اسپورٹس کمپلیکس راولپنڈی ٹی گوازی تاآسراتی نا بناءِ کننگ نا وخت آمیڈیا تون گپ وتران کرسا کرے۔ بنجائی وزیر داخلہ شیخ رشید احمد پارے کہ آزاد کشمیر و گلگت بلتستان نا بڑزکو عہدیدار آتے ہم بلیو پاسپورٹس جاری مریک، رنگ روڈ اتون اوار اوار لئی ایکسپریس وے ءِ ہم ایسر اسکان سرکینہ، اپوزیشن ءِ مخاطب کرسا بنجائی وزیر داخلہ پارے کہ دا 23 مارچ آ ہم بریر ہُریر، اگہ دا کانود ءِ دوٹی ہلتور تو کانود ہم اوفتا برخلاف حرکت اٹی بفک۔ بنجائی وزیر داخلہ شیخ رشید احمد پڑو کرے کہ آزاد کشمیر و گلگت بلتستان نا بڑزکو عہدیدار ، باسک آتے ججز و گریڈ 22 نا آفیسر آتے وزارت داخلہ بلیو پاسپورٹ نا جاری کننگ نا فیصلہ کرینے۔ اوپارے کہ مچ آ زند پولیس نا سیاست ءِ کتوٹ نئے بدماش اسے کاٹم ہرفنگ کن اِلانٹ و ہراتم اسکان زندہ اُٹ دا شار اٹی بدماشی ءِ کاٹم ہرفنگ کن الیپرہ، راولپنڈی شریف آتاشار ءِ، ننامسنک خوانوک ءُ، داڑے مسہ یونیورسٹی جوڑ مسنے، ان شاءاللہ 120 ارب روپئی نا نالہ لئی ایکسپریس وے ڈٹ ہم زوت بناکیک، دا ڈٹ انا سوب آن راولپنڈی نا باتی تا تقدیر بدل مریک و پوسکن آ راولپنڈی مریک۔ وزیرداخلہ پارے کہ چمن و طورخم بارڈرآ ہم مشین خلنگانے، راولپنڈی رنگ روڈ، نالہ لئی ایکسپریس وے اتون لمہ چنا ہسپتال ہم زوت ایسر اسکان سرمریک۔ وزیرداخلہ پارے کہ مسہ نیم سال اٹی اپوزیشن قومی اسمبلی یا سینیٹ اٹی اسہ بل اسے آہم عمران خان ءِ شکست تننگ کتنے ، اپوزیشن بھاز شورکریکہ کہ استیفہ ایتنہ ولے دااستیفہ غاتیان ہم نرار ولدا دا بے پتی آن ہم نرار، داسہ دا 23 مارچ ءِ ہم شوق اٹ بریر ہُریر، دااسلامی دنیا نا راہشون تے ہم ناراض کننگ والا ءُ، قوم اپوزیشن نا سوچ آتیان بلد ءِ۔
