اسلام باد۔ 26 جنوری (اے پی پی) وزیرخارجہ شاہ محمود قریشی پارینے کہ کورونا دین آن پد ہم پاکستان زرگزرانی وڑاٹ بحالی نا کنڈآ ہنانے، نجی بشخ انا کمکاری آن دیرپاشونداری نا ایجنڈا 2030 نا ہدف آتا دوئی کننگ ءِ ممکن کننگ مریک، دنیا نا خواست آتے مون آ تخسا حکمت عملی اس مون آ اتوئی مریک، کرپٹ لیڈر شپ، پدتموک ملک آتا غٹ آن بھلا المیہ ءِ، ننے ملک ءِ مو ن آ دننگ کن سوچ انا دنگ اٹ بدلی اتوئی مریک، 5.4 درسد گروتھ گنج اس اف، ننے اودے مون آ دروئی ءِ۔ چارشنبے نادے آ وزارت خارجہ ٹی ’’پائیدار شونداری ٹی نجی بشخ آن فائدہ ہرفنگ‘‘ نا سرحال آن اڈ ہلوک آ دود آن تران کرسا وزیرخارجہ پارے کہ ننے گچین وڑاٹ مون آ ہِننگ کن چندی سوچ آتے تیناکروئی مریک۔ مستین نا ردینک آتے وار وار آ ولدا کرسا نن مون آ ہِننگ کپنہ۔ شاہ محمود قریشی پارے کہ تدوک آ اِرا سال اٹی کورونا دین آن پد ہم پاکستان زرگزرانی وڑاٹ بحالی نا کنڈآ ہنانے و ورلڈ بینک دادے پک کرینے۔ 2018 ٹی ہراتم نن حکومت نا باگ دوڑ ءِ سنبھالان تو غٹ زرگزرانی ٹک آک منفی ٹی ئسر، نن 20 ارب ڈالر نا اقتصادی پرخ ءِ پورو کننگ کن دمدستی کوشست آتے کاریم اٹ ایسون۔ ای ریاض ، ابوظہبی، و بیجنگ نا دورہ ءِ کریٹ، اوفک ننا کمک ءِ کریر ولے او ننا دمدستی گرج آتے پورو کننگ کن گنج اس الور، چنانچہ ننے آئی ایم ایف تون رجوع کروئی تما۔ اینو نن دا ملک اٹی پائیدار شونداری نا ہیت ءِ کننگ اُن ہراداسکان آئی ایم ایف پروگرام نا بشخ ءِ۔ شاہ محمود قریشی پارے کہ ہشتاد نا دہائی ٹی، ننا شونداری 6 درسد آ ئسک ولے اوکان پد دا کچ برقرار سلنگ کتو، ننے دا گروتھ نا کچ ءِ دیرپا کننگ کن گام گیج کروئی مریک۔ اینو 5.4 درسد گروتھ ءِ گنج اس پاننگ مفک ، ننے اودے مون آ دروئی ءِ۔ ننے آؤٹ آف باکس سوچ ءِ مون آ دروئی مریک و دنیا نا خواست آتے مون آ تخسا حکمت عملی اس مون آ اتوئی مریک۔ شاہ محمود قریشی پارے کہ ننا حکومت قومی سلامتی پالیسی ءِ جاری کرے ہرانا بنداوی جزو اقتصادی سیکورٹی ءِ۔ مخدوم شاہ محمود قریشی پارے کہ پدتموک دنیا 2030 نا پائیدار شونداری نا ہدف آتا دوئی کننگ اٹ داسکان بھاز پدی ءِ۔ ننا حکومت یونیورسل جان جوڑی کارڈ جاری کرے ہرانا رداٹ پاکستان نا ہر خاہوت ءِ ہیلتھ انشورنس نا ضمانت ایتک۔ ننے ادراک ءِ کہ ناجوڑی نا اسہ جھٹکہ خاہوت اسے نیزگاری نا لکیر آن شیف دننگ کیک، دا جان جوڑی کارڈ، ہربندغ ءِ احساس رکھ فراوان کیک۔ وزیرخارجہ پارے کہ اینو ننے زرکاری 16 درسد کچ اتون درکار ءِ وخت اس کہ ننا ساڑی آ کچ 2 درسد ءِ، ننے درکار کچ انا دوئی کننگ کن گڑاس جتا ءُ اپروچ اس تینا کروئی مریک۔ اوپارے کہ جان جوڑی کارڈ انا کمک اٹ جان جوڑی نا بشخ اٹی پرائیویٹ زرکاری ءِ مون آ دننگک۔ اوپارے کہ ننے ہر وار آئی ایم ایف نا کنڈآن بجلی نا نہاد آتیٹی ودکی نا مشورہ تننگک، ننے توانائی نا بشخ اٹی پوسکن آ سوچ ءِ مون آ دروئی مریک۔ ننے ہروئی ءِ کہ وسیلہ غاتا پرخ ءِ امر کم کننگ مریک۔ مخدوم شاہ محمود قریشی پارے کہ کشاری بشخ اٹی بجلی نا کھپت ءِ پورو کننگ کن ، شمسی توانائی ءِ کاریم اٹ اتسا اونا مون ءِ توننگ مریک۔
