سرینگر۔ 26 جنوری (اے پی پی) بھارت نا غیر کانودی کوزہ گیری ٹی جموں و کشمیر اٹی کل جماعتی حریت کانفرنس نا راہشونک پارینو کہ بھارت جمہوری آخا بلکن اسہ دہشت گرد ملک اسے انتئے کہ اونا فورس آک بے گناہ کشمیری تا نسل کشی ٹی اوار ءُ۔ کشمیر میڈیا سروس نا رداٹ کل جماعتی حریت کانفرنس نا راہشون سید بشیر اندرابی و خواجہ فردوس ئسک سرینگر اٹی جاری اسہ اسیجائی بیان اسے ٹی پاریر کہ بھارتی جمہوریہ دے کشمیری تیکن تہار دے اسے۔ اوفک پاریر کہ بھارتی فوجیک ہفت دہائی آن مقبوضہ علاقہ ٹی دہشت گردی نا بازار ءِ گرم کرینو۔ اوفک پاریر کہ بھارتی جمہوریہ دے و یوم آزادی مدام مقبوضہ جموں و کشمیر نا مخلوق کن پین مشکل اتیک انتئے کہ کوزہ گیر فوجیک داوڑنا موقع غاتیا کشمیری تیا تینا ظلم اٹ ودکی کیرہ۔ سید بشیر اندرابی و خواجہ فردوس ئسک پاریر کہ نریندر مودی نا کماشی ٹی فسطائی بھارتی حکومت نئے بیرہ کشمیری بلکن بھارت اٹ غٹ اقلیت آتے توننگ کن وحشیانہ چم آتے کاریم اٹ اتنگ ءِ۔ اوفک پاریر کہ مودی حکومت کشمیری و اقلیت آتا زند ءِ ژند کرینے ہنداخاطرآن بھارتی حکومت ءِ تینا جمہوریہ دے ءِ اڈتننگ نا ہچ ءُ حق اس اف۔ اوفک جہانی برادری آ زور شاغار کہ او سویلی ایشیاٹی آخبتی امن ءِ پک کننگ کن کشمیر نا جھیڑہ ءِ کشمیری تا است خواہی تا رداٹ ایسر کفنگ اٹ تینا کڑد ءِ ادا کے۔
