اسلام آباد۔ 26 جنوری (اے پی پی) کل جماعتی حریت کانفرنس نا آزاد کشمیر شاخ بھارت نا پن انا جمہوریہ دے ءِ تہاردے انا وڑاٹ اڈتننگ کن اسلام آباد اٹی بھارتی ہائی کمیشن نا مون آ برانزی مچی اس کرے۔ کشمیر میڈیا سروس نا رداٹ برانزی مچی ٹی حریت راہشون تیان بیدس آزاد جموں و کشمیر نا چندی سیاسی جماعت آتا سروک آک و ایلو راہشونک بشخ ہلکر۔ داوخت آ ترانکارآک پاریر کہ جمہوریت السی سلاہ نا شرف نا پن ءِ ولے بھارت وخت اس ہم السی سلاہ نا شرف ءِ کتنے۔ اوفک پاریر کہ بھارت ءِ مقبوضہ و جموں و کشمیر اٹی تینا جمہوریہ دے انا دود آتا اڈتننگ نا ہچ ءُ حق اس دوئی اف انتئے کہ اوعلاقہ ٹی غیرکانودی وڑاٹ کوزہ کرینے۔ حریت راہشون و ایلوفک مقبوضہ علاقہ ٹی ودوک آبھارتی ریاستی دہشت گردی آ گڑتی نا درشانی ءِ کرسا پاریر کہ بھارت ءِ دا پہہ مرے کہ او واک انا وحشیانہ کاریم اٹ اتنگ آن کمشیری تا جوزہ آجوئی ءِ اسُل توننگ کپک۔ اوپارے کہ کشمیریک اسہ عظیم ءُ مسخت اسے کن تینا جون تے ندر کننگ ءُ و او تینا جہد مسخت نا دوئی کننگ اسکان ہر بہاآ برجاتخرہ۔ اوفک پاریر کہ تنازعہ کشمیر ءِ ایسر کننگ آن بیدس سویلی ایشیاٹی دیرپا امن نا ٹہیفنگ ممکن اف۔ حریت راہشونک جہانی برادری آ زور شاغار کہ مقبوضہ علاقہ ٹی ظلم انا چٹفنگ کن بھارت آ زور شاغے۔ مچی نا ایسر آ بھارت مخالف ریلی اس ہم کشنگا۔
