مشکل حالیت آتیان پد ہم پاکستان زرگزران نا چندی بشخ آتیٹی گچینی نشان تس، صدر ڈاکٹر عارف علوی نا سکھر چیمبرنا ڈل اتون اوڑدہی ٹی گپ وتران

سکھر۔ 25 جنوری (اے پی پی) صدر مملکت ڈاکٹر عارف علوی ملکی زرگزران نا گچینی کن کاروباری تپہ و چیمبرز نا کڑد ءِ بھاز اہمیت تخوک گوندسا پارینے کہ مشکل حالیت آتیان پد ہم پاکستان زرگزران نا چندی بشخ آتیٹی گچینی نشان تس، دابابت حکومت نا پالیسی تا جہانی کہول آ اعتراف ءِ کننگانے، ننے دنیا تون شونداری نا عمل اٹ اوار مننگ کن ڈیجیٹلائزیشن نا کنڈآ ہنوئی مریک۔ داخیال آتا درشانی ءِ او سکھر چیمبر آف کامرس نا ڈل اتون اوڑدہی ٹی گپ و تران کرسا کرے۔ داوخت آ دیوان اٹی گورنر سندھ عمران اسماعیل، حلیم عادل، شیخ خرم شیرزمان، سینیٹر سیف اللہ ابڑو و پوریاگر راہشونک بشخ ہلکر۔ دیوان اٹی سکھر چیمبر آف کامرس نا صدر عامر عملی خان غوری حوال تس۔ داوخت آ صدر مملکت ملکی زرگزران نا گچینی کن کاروباری بندغ و چیمبرز نا کڑد ءِ بھاز اہمیت تخوک گوندسا پارے کہ مشکل حالیت آتیان پد ہم پاکستان زرگزران نا چندی بشخ آتیٹی گچینی نشان تسنے، دا بابت مچ آ دنیا ٹی حکومت نا پالیسی تا اعتراف کننگانے۔ صدر مملکت پارے کہ پاکستان کشت وکشار تون اوار کیہی بشخ آتیٹی گچین کارکڑد نشان تس۔ مچ آ دنیا ٹی کبینی ترندی اٹ ودانے و دانا اثرآک ہرجاگہ غا ظاہر مسنو۔ اوپارے کہ چیمبر آف کامرس ، کاروباری بندغ و زرکارآتا ملکی زرگزران اٹی کڑد بھاز اہم ءِ، حکومت پوریاگر برادری ءِ سازگار چاگڑد اس فراوان کننگ کن سنبرینگوک ءِ۔ صدر مملکت ورناتے چیمبرز و چندی یونیورسٹی تا کمک اٹ ووکیشنل ٹریننگ فراوان کننگ آ زور شاغسا پارے کہ حکومت نا کنڈآن سرسہب ورنا پروگرام و وام تا فراوانی آن زالبول آتے واکدار کننگ کن گام گیج کننگ انگ ءِ۔ صدر مملکت ڈل ءِ سکھر ایئرپورٹ آن انٹرنیشنل فلائٹس، ڈرائی پورٹ و انڈسٹریل زون نا بابت سلاہ و وج تننگ نا پارت کرے و پارے کہ سکھر ریجن نا شونداری کن گام گیج کرسا کینہ، حیدر آباد سکھر موٹروے آن الس ءِ سفری آسراتی ملک و کاروباری سرجزآتیٹی ودکی مریک۔ صدر مملکت پارے کہ ننے آئی ٹی نا بشخ آتیٹی پین شون ہلوئی مریک، مچ آ دنیا ٹی آئی ٹی ڈیجیٹل اسکلزپروگرام آن لکھ آ ورناک روزگار کٹیا کننگ ءُ، ننے دنیا تون شونداری ٹی اوار مننگ کن ڈیجیٹلائزیشن نا کنڈآ ہنوئی مریک، دیوان اٹی کاروباری بندغ آتے پیش بروک آ ویل و اوفتا ایسر کننگ کن سلاہ تیا گپ وتران کننگا۔